DANIËL ENSLIN werk by die stadsraad en leef ’n valerige lewe. (“Sy lewe haper, soos om met ’n halwe pak kaarte solitaire te speel.”) Behalwe: Hy is vriende met ’n boef en hierdeur beland hy in ’n verknorsing, want hy sien een aand hoe dié Frank vermoedelik ’n prostituut versmoor. Hy beland in ’n getuiebeskermingsprogram, maar die polisievrou Erica van der Linde het ’n uiters vreemde manier om mense soos hy te “beskerm” . . .

Die spanning loop heeltyd hoog in ’n Ander Mens, ’n roman deur Zirk van den Berg, ’n kopieskrywer wat in Nieu-Seeland woon, in Namibië gebore is en in Suid-Afrika grootgeword het waar hy onder meer ’n joernalis was by Beeld en Die Burger. Hy het die boek destyds in Engels geskryf – die New Zealand Herald het Nobody Dies in 2004 as een van sy topvyf rillers aangewys.

Ons het vir Zirk gevra hoe en waar het hy navorsing gedoen oor onder meer ’n getuiebeskermingsprogram?

"Dis geheel en al uit die duim gesuig. Ek het wel indrukke gebruik wat ek opgetel het in my paar weke as ’n misdaadverslaggewer vir Die Burger in die 80’s, maar dit was meestal oor die gevoel van die polisiekantore en so aan. Ek wou nie dat feite in die pad van ’n lekker storie staan nie."

En hoe goed is sy Afrikaans nog? 

"Ek praat daagliks Afrikaans met my vrou en meestal met my kinders ook. Ek het min geleentheid om Afrikaans met ander mense te praat, synde ek min Afrikaanssprekende vriende hier het. As gevolg van hierdie afgesonderde bestaan is my Afrikaans seker ’n bietjie verroes en outyds. Die uitdrukking “eisj” het byvoorbeeld nie in Afrikaans bestaan toe ek nog hier gewoon het nie."

zirkboek