As ’n mens se baba op nege maande al sy hande begin klap wanneer sy ma ’n boek optel, is dit ’n plesier om ’n paar op ’n slag vir resensering te ontvang.

LAPA Uitgewers het die gewilde Engelse Peek-A-Books in Afrikaans laat vertaal as Koekeloer-boekies. Dit het prettige flappies wat wys hoe jong diere grootword. In Wilde Diere word kameelperde langer en leeuwelpies groter en sterker, terwyl vissies en krappies in Onder die See (R60 elk) met die lig van ’n flap groei. Die eenvoudige rym waarin die boekies geskryf is en die kleurryke, kinderlike illustrasies is ’n wenkombinasie.

Tom en Tessa Se Groot Skattejag (R90) is vir ouer kinders wat aangemoedig word om elemente in besonder gedetailleerde illustrasies op te spoor. Dis soos ’n opvoedkundiger weergawe van die bekende Where’s Wally. Behalwe vir die soektog na Tom en Tessa se wye vriendekring van diere, is daar ook spesifieke vorms, kleure en getalle wat geïdentifiseer moet word. ’n Rooi vierkantige vlag op die strand, twee ronde blou tamboeryne in die parkie of vyf vierkantige pienk koeke by die mark – hopelik moedig dit jou kind aan tot ’n daaglikse, spontane skattejag elke keer dat julle uitgaan.

Penguin Books gee ook nou Ladybird-boekies in Afrikaans as Klinkende Feëverhale uit. Bekende sprokies kom met vyf saamlees-klanke. Sekere elemente in die verhaal verskyn op ’n paneel langs die boek: In die ou gunsteling Jan en die Boontjierank (R49) kan die leser die geluid van die reus se harde voetstappe hoor, en in Aspoestertjie klink die towertante se swaai van haar towerstaf soos ’n Disney-fliek – te lekker! – Jana-Marie Koen