[caption id="attachment_51478" align="alignnone" width="600"]Links: Die omslag. Regs: Mike Nicol. Links: Die omslag. Regs: Mike Nicol.[/caption] Die boek Dieners & Donners deur Mike Nicol (R120, Umuzi. E-boek R96, kalahari.com. Ook beskikbaar by amazon.com vir Kindle: $8,80) Die punte 4 uit 5 sterre

“DIT klink alteveel soos vinkel en koljander,” sê vriend Gerhard toe hy hoor ek lees ’n boek met die titel Dieners & Donners. “Polisie en diewe – een en dieselfde ding!”

En al het Gerhard die boek in daardie stadium nog nie gelees nie, is sy opsomming nie ver van die kol nie. Want die top-misdaadskrywer Mike Nicol se nuutste speurroman gaan juis daaroor dat die grense tussen “dieners” en “donners” in Suid-Afrika soms maar vaag is – en ook oor hoe party mense in ons huidige regering ewe onderduims is as hul eweknieë in die destydse apartheidsregering. Vinkel en koljander, inderdaad.

Dis regtig wonderlik dat ’n boek van die top-misdaadskrywer Mike Nicol nou ook in Afrikaans vertaal is. Dieners & Donners – die oorspronklike titel is Of Cops & Robbers – is spannend, vermaaklik en boeiend. Wel, eintlik heeltemal onneersitbaar. Tot my huismense se konsternasie het ek ’n dag lank ophou leef terwyl ek met my neus in die boek gesit het; ek móés dit net op een slag klaar lees.

Die ander voordeel van die boek in een sitting deurlees is dat jy nie deurmekaar raak met al die kleurryke karakters en meesleurende storielyne nie. Verskillende stories wissel mekaar af, maar sentraal in die verhaal is die aantreklike blonde branderplankryer en privaatspeurder Fish Pescado en sy meisie, die prokureur Vicki Kahn, wat daarop uit is om vas te stel wie ’n toeskouer doodgery het tydens ’n onwettige motor-jaagwedren deur die strate van Kaapstad. In die proses krap hulle ’n nes van moord en korrupsie oop en word self daarby betrek. Daar is ook talle terugflitse na die 1970’s en ’80’s, waar lede van ’n polisie-moordbende hulleself besig hou met die vermoor van teenstanders van die Suid-Afrikaanse regering – alles op werklike gebeure  gegrond. Soos dit ’n goeie spanningsverhaal betaam besef lesers eers naby die naelbyt-einde heeltemal hoe al die verskillende gebeure in die boek met mekaar verband hou.

Voeg by hierdie storielyne ’n oud-polisiehoof wat ’n pedofiel en smokkelaar is, ’n sinistere fixer wat probleme met ’n geweer oplos, ’n onbeholpe dwelmhandelaar en sy handlanger, en ’n hele rits minder belangrike karakters wat die een so fassinerend soos die ander is – en jy sal verstaan waarom die boek so boei. Jy is diep ontroer wanneer jy lees oor die Angolese skoonheidswedstryd vir meisies wat ledemate in landmynontploffings verloor het, jy is van voor af geskok oor die moordbendes van gister en die moordenaars van vandag, en jy lag heerlik vir die onverwags snaakse tonele en  bisarre situasies wat soms so tipies van SA is.

En dis net die storie! As jy fyn lees, sal jy heelparty prettige leidrade en interessante verwysings raaksien, soos dat sommige karakters se persoonlikhede deur hul name weerspieël word. Die boek wemel ook van musiekverwysings, en jy kan agterna na die opnames gaan luister omdat die uitgebreide outeursnota verduidelik waar op die internet jy dit kan opspoor.

- Joan van Zyl

  • Dieners & Donners is deur Jaco Botha vertaal. Ek het egter die boek in Engels gelees.,

Lees ons ander boekeblogs:

Eleanor & Park deur Rainbow Rowell

Writing the Blocbuster Novel; Om te Skryf

The Jewels of Paradise deur Donna Leon

The Cuckoo’s Calling deur Robert Galbraith (JK Rowling)

Nuwe boeke vir kleingoed en ampertieners

Twee nuwe hygromans

Reacher's Rules

Todo in Tuscany deur Louise Badger en Lawrence Kershaw, Vanilla Beans & Brodo deur Isabella Dusi

Inferno deur Dan Brown

Snydokter deur Leon van Nierop