Waaroor gaan dit?

’n Onderwyseres en haar dogter gaan woon op Loxton en bots met ’n nors vent wat naby hulle bly. Toe ’n geldinsamelingsveldtog vir die plaaslike skool gehou word, ontdek die vrou die kluisenaar se ware identiteit.

Wie sal hiervan hou?

Huisgenoot-lesers behoort dol te wees oor dié minsame en veilige liefdesverhaal. Maar dis veral Theuns Jordaan- en Elizma Theron-bewonderaars wat meer as genoeg van die paartjie sal sien. Die natuur en skoonheid van die Karoo vorm die middelpunt van dié intieme liefdesverhaal waarin ’n skool gered word en ’n vrou besef dat liefde alles kan vermag. Die storie is dalk ’n bietjie naïef en die spel nie so goed soos in ander rolprente nie, maar die fliek se doel (om te vermaak en om ’n Afrikaanse liefdesverhaal te vertel) is suiwer en daarom behoort dit ondersteun te word. Die musiek is inspirerend en die ontknoping sal gehore tevrede stel. Aanbeveel as jy net lekker agteroor wil sit en fliek, maar beslis nie as jy te krities dink nie.

Wag vir DVD?

Ja, want jy sal dalk weer na die tonele wil kyk waar Theuns Jordaan lostrek en die stof uit die Karoo-bossies sing, maar dis eintlik beter om dit op ’n wye doek te sien, al is dit net om jou gunsteling-sangers hul ding in ’n teater in glans en

praal te sien doen. Jong Janke Bruwer vaar nie te sleg nie, maar dis Neil Sandilands wat die kollig steel met sy opgewekte en eksentrieke vertolking. Deon Meyer se storie is bevredigend, maar jy moet jou breinselle afskakel en die fliek geniet as ’n teruggryp na die liefdesverhale van die 60’s.

Soortgelyke flieks

Hoor My Lied, Die Danie Bosman Storie, Lied in My Hart.

JAKHALSDANS

Romantiese drama. Met THEUNS JORDAAN, ELIZMA THERON en JANKE BRUWER. Regisseur: Darrell James Roodt.

Ouderdomsperk: Almal

Begin 23 April.

Ons dink: 2/5