Die oomblik toe ek sien Sam Woulidge bied ’n kosklas aan as deel van die bekendstelling van haar boek, het ek geweet ek moet daar wees.

Dié smulpaap en rubriekskrywer vir die kostyd-skrif Taste is ironies genoeg nie self ’n voorslag in die kombuis nie en dis hoe Confessions of a Hungry Woman gebore is: Sy het haar vriende gevra om vir haar hul beste resepte te gee wat so flatervry is dat selfs sy dit kan maak.

En by die kosklas het Sam bewys dit werk. Sy het Jacques Erasmus se botterhoender gemaak – ’n gebakte weergawe en die beste wat ek nog geproe het. Daarna het sy ons gewys hoe om die sjef Giorgio Nava se botterskorsieravioli te maak, en ’n brood met tamatie en olywe van Jannie du Toit en Judy van der Walt.

Tussen die kokery deur het Sam vertel hoe moeilik dit vir ’n joernalis kan wees om mense se intieme stories uit hulle te kry. Maar, het sy vertel, vra iemand uit oor iets soos kaneel, dan stroom herinneringe van lang middagetes aan oupa en ouma se tafel en besef jy hoe die reuk, smaak en tekstuur van kos ingeweef is in ons geskiedenis.

Dis sulke stories wat sy opgeteken het en wat van haar eerste kosboek iets besonders maak (tesame met haar vriende se kampioenresepte).

– Kim Arendse