Die Nederlandse skrywer Adriaan van Dis het maande lank navorsing hier by ons gedoen om hierdie tweede roman oor Suid-Afrika te skryf. Die eerste was die omstrede Het Beloofde Land.

Dis beslis nie ’n onspanningsverhaal nie. Dis die storie van twee wit mans, die Nederlander Mulder, en die Suid-Afrikaner Donald, wat as studente betrokke was by die verset teen apartheid.

Ná 40 jaar hernu hulle hul vriendskap en gaan nie net saam op reis na die plekke van hul jeug nie, maar hulle stap ook terug op die spore van herinnering oor liefde en verraad; die werklikheid oor die Suid-Afrika wat hulle wou bevry, die land waar armoede en vooroordeel mense nou nog bind.

Mulder en Donald ontferm hulle oor ’n tikverslaafde seun aan wie hulle ’n nuwe toekoms wil bied.

Hy word ’n simbool van hul ontnugtering met die land. Soos Mulder oor Suid-Afrika sê: “?’n Bevryde land, en tog is dit hier gevaarliker as enige ander plek in die wêreld. ’n Mens is hier in elk geval bewus van die lewe, selfs al kan jy dit ook enige dag verloor.’’

En soos met soveel ander oorspronklik Nederlandse gedigte en romans knetter hierde vertaling van Daniel Hugo met vars Afrikaans.

Volg Huisgenoot op Twitter.