Dit reën en reën die hele dag – g’n tyd vir speel, g’n tyd vir lag. Nou drink ek maar papawerwyn totdat die son weer môre skyn.

Dis die arme mejuffrou Muis se lot daar waar sy vakansie hou in Plett. Maar toe die son eers skyn, toe is Hotel De Muis ’n paradys “met roomys en met rolletjies / en lekker bloukaasbolletjies”.

Watter klein kind sal nie Philip de Vos se rollende Afrikaans raakhoor en later die teks uit die kop ken nie?

Naas sy vertalings is daar die lieflike illustrasies deur Marije Tolman wat dié vier Nederlandse boekies ’n onontbeerlike toevoeging tot die boekrak maak.

Die fyn tekeninge in sagte kleure wemel van detail wat kinders lank sal besig hou, soos ook die humoristiese aanslag: muise se huise op pale, muise met sonbrille en juwele, die lug vol vlieënde ooievaars met babas van alle soorte in die bek: olifantjies, jakkalsies, luiperdjies . . . die hele Ark.

Die skrywers, Elle en Erik, is ’n egpaar wat al van 1990 af saam skryf aan kinderboeke, liedjies en versies en hulle vertaal ook rymende kinderboeke uit Engels en Duits.

Volg Huisgenoot op Twitter.