[caption id="attachment_53006" align="alignnone" width="650"]Hooffoto: Mari-Louis, haar man, Chris, en hul woelige spruite in die kombuis by hul huis. Mari-Louis Guy, haar man, Chris, en hul woelige spruite in die kombuis van hul huis. Foto: Martin de Kock. Ontwerp: Anton Sassenberg
[/caption] Mari-Louis Guy en haar broer, Callie Maritz, is albei kosghoeroes én ouers wat ’n klomp balle tegelyk in die lug moet hou. Marie-Louis blog oor hul gunstelingresepte, -kookboeke en al die raad wat nodig is om kalmpies te kook en geniet al moet jy elke dag waansinnig van bakboord na stuurboord skarrel. Maak seker jy lees tot heel onder want daar is baie onmisbare resepte en ’n kookboek te wen! Maar laat Mari-Louis haarself en Callie eers voorstel. [caption id="attachment_52925" align="aligncenter" width="600"]Die broer-en-susterspan Mari-Louis Guy en Callie Maritz. Die broer-en-susterspan Mari-Louis Guy en Callie Maritz. Foto: Martin de Kock[/caption] Jou huis is waar jou hart is

DAGSÊ. Ek is die 46-jarige ma van drie kinders, onderskeidelik agt, vier en twee jaar oud, en elkeen in ’n ander skool.

My werk as ’n vryskut-kosstilis en kookboekskrywer beteken ek moet elke dag op my kreatiewe tone wees, en elkeen van daardie dae bevind ek my op ’n verskillende plek of stel, by ’n nuwe kliënt of omring deur nuwe kreatiewe mense en dinge.

My wonderlike man, Chris, is die kaptein van ’n luukse jag op die Middellandse See, wat beteken ek is vir lang rukke ’n grasweduwee.

Party mense dink dis vreemd dat ek met my enigste medespruit saamwerk: die baie koel mnr. Callie Maritz. In die ses jaar dat ons ons terug op Afrika-bodem bevind, het ons as broer-en-suster-span saam vyf kookboeke geskryf en gestileer, saam aan byna 200 TV-advertensies en -video’s gewerk en ontelbare foto’s van kos saam laat verskyn.

Ek is ’n besige, besige meisie!

Jy dink dalk ek smag na meer slaap, kalmte en rus tussen die bedrywige dae, maar eintlik wil ek net koek hê!

Ek wil koek hê vir ontbyt, en dan wil ek nog dinge doen. Nog sien, nog leer, nog liefhê, nog lees, nog skryf, nog lag, nog bak, nog eet en dit boonop ook nog regkry om goed te lyk terwyl ek al hierdie dinge doen.

Ek wil alles gelyk wees: ’n liefdevolle ma, ’n onselfsugtige minnares, ’n goeie dogter, ’n sorgsame suster, ’n gesellige en beskikbare vriendin en ’n uitstekende gasvrou.

Tussen dit alles deur probeer ek my elke dag herinner aan die beste raad wat ek nog gekry het:

Die lewe bestaan uit ’n klomp balle wat jy in die lug moet hou. Jou werk, jou huis, jou motor en jou sosiale planne is alles rubberballe. Alles wat met jou gesin te doen het, is glasballe. Hanteer hulle met uiterste sorg. Rubber bons, maar glas breek – maak dus seker jy laat die glasballe nooit val nie.

Maar terug by koek.

Kos was nog altyd sentraal in my lewensreis: tydens my grootwordjare in ’n klein dorpshotel, deur my studies vir ’n huishoudkunde-honneursgraad, in my vyf jaar by ’n groot supermarkgroep waar ek nuwe kosprodukte moes help ontwikkel en toets, in my 11 jaar as privaat sjef op enorme seiljagte, en nou as kosstilis en skrywer.

Van buite af lyk alles heeltemal glansryk.

Die hartseer waarheid is egter dat ’n mens heeltemal te maklik van die lewe se oorwinnings vergeet en jouself definieer volgens jou klein daaglikse mislukkings en bekommernisse. Nes daardie TV-advertensie waarin vroue dit so maklik vind om al die foute met hul liggaam uit te wys maar nie so maklik kan sê wat aan hul lyf hulle van hou nie.

Ons het baie jare gesukkel om swanger te raak. Ek het myself selfs die Onvrugbaarheidskoningin genoem. Sedertdien het die lewe ons met drie perfekte kinders beloon en verlustig ons ons elke dag in ons rol as ouers, maar ek voel steeds dat my lyf en my gees vergiftig is deur jare van vrugbaarheidsbehandeling en daardie gevoel van algehele mislukking.

Ek is al 23 jaar getroud met ’n wonderlike man, maar my ouers is geskei toe ek ’n tiener was en ek kan steeds nie ontslae raak van die gevoel dat alles heeltemal verkeerd kan loop nie. Ek word steeds gedefinieer daardeur dat ek uit ’n gebroke huis kom. Daardie ontgogelde, eensame meisie sal altyd by my wees.

Ek is ’n vrot tuisteskepper. Soos ’n tipiese stilis is my huis vol stapels pragtige erdewerk, eetgerei en messegoed, maar ek kry dit nie reg om enigiets sinvol te rangskik nie. Ek is seker goed spring net by kaste uit sodra ek die kamer binnestap. Maar bak bly my gelukkige plekkie! As die klein goedjies te veel word, skakel ek my oond en koekmenger aan, kies een van my talle koekblikke en bak! Op hierdie blog deel ek van my gunsteling-resepte met al julle bakkers en besige mense daarbuite, asook ’n paar kookboekbesprekings en ander dingetjies wat die lewe makliker maak. Ek het mos genoem ek is versot op koek. Kom ons spring weg met een van ons gunsteling-resepte: sebrakoek. Anthony, ’n reklamebestuurder in Londen, het ons eerste boek, Koeke Ter Viering van Liefde en Lewe, gekoop. Hy’t so baie van een resep gehou dat hy ons aanlyn gekontak het. Ons het heerlik gesels en hom op die ou end vir ’n drankie ontmoet toe hy Kaapstad besoek het. Hierdie resep is Anthony s'n  – ons verwys nou daarna as ’n global village-koek.

SEBRAKOEK

Lewer 12 porsies

KOEK

280 g (2k) koekmeelblom

5 ml (1 t) bakpoeier

4 eiers

200 g suiker

125 ml (½ k) melk

250 ml (1 k) kookolie

5 ml (1 t) vanieljegeursel

30 g kakaopoeier

gerasperde skil van 1 lemoen

SJOKOLADEBOTTERROOMVERSIERSEL

60 g kakaopoeier

125 g botter, gesmelt

385 g versiersuiker, gesif

80 ml (1/3 k) melk

5 ml (1 t) vanieljegeursel

Voorverhit die oond tot 180 °C. Smeer en voer ’n ronde 23 cm-koekpan uit.

KOEK

1 Sif die meel en bakpoeier saam.

2 Gebruik ’n elektriese menger met ’n klitserhegstuk en klits die eiers en suiker saam tot lig van kleur.

3 Meng die melk, olie en vanieljegeursel in ’n aparte bak. Voeg die meel en melkmengsel om die beurt by die eiermengsel. Begin en eindig altyd met die droë bestanddele. Klits ná elke byvoeging tot goed gemeng.

4 Verdeel die beslag eweredig in twee bakke. Vou die kakaopoeier en lemoenskil by die een helfte om die Sjokolademengsel te vorm.

5 Jy behoort nou ’n sjokolademengsel en ’n gewone mengsel te hê. Skep ’n groot lepel vol van die gewone mengsel in die middel van die koekpan. Skep ’n groot lepel vol van die sjokolademengsel direk bo-op. Die gewig van die boonste beslag sal veroorsaak dat die onderste beslag in ’n konsentriese sirkel uitsprei.

6 Hou aan om die sjokolade- en gewone mengsel om die beurt te skep, en wag altyd vir die beslag om uit te sprei voor jy nog ’n lepel vol byskep. Tel die koekpan op en sit dit hard op die werkoppervlak neer om lugblasies te verwyder.

7 Bak dit 35 tot 45 minute in die oond of tot die middel van die koek terugspring wanneer jy liggies daarop druk.

8 Sit die sebrakoek net so voor, of versier met sjokoladebotterroomversiersel.

VERSIERSEL 1 Roer die kakao en botter tot ’n gladde pasta. 2 Skep dit in die bak van ’n elektriese menger. Gebruik die klitser-hegstuk en klits teen mediumspoed, terwyl jy om die beurt die versiersuiker en melk byvoeg. Begin en eindig met die versiersuiker. 3 Klits tot die mengsel smeerdikte bereik. Voeg nog ’n skeut melk by indien nodig. 4 Roer die vanieljegeursel by. Wenk Maak die koek in afsonderlike mengsels as jy die resep wil verdubbel.

Ons het so baie van Anthony se resep gehou dat ons dit opgeneem het in ons boek Onthaal op Groot Skaal.

Hier kan jy na ’n kort video oor die boek kyk: Daar's ook ’n heerlike nuwe boek oor Weskuskos uit wat jou regtig sal laat smul.

’n Onlangse studie het gewys dat die gemiddelde verbruiker van  kookboeke gewoonlik net twee resepte  uit elkeen van hul kookboeke maak.  Ek en Callie het dus elkeen ’n resep uit hierdie boek beproef.

Boek Elke Dag Koningskos

Skrywer Christine Capendale

Ontwerper Petaldesign

Fotograaf Myburgh du Plessis

Stilis Sonja Jordt

Christine is nes ons oorspronklik ’n Weskusser en ons was dus  sommer dadelik bevooroordeeld oor haar geregte.

Callie het die peperbeesfilet met roket-en-peperwortelsous gemaak en was beïndruk. Dis reg in sy kraal.  ’n  Lekker vinnige resep met uithangwaarde. Die sous kan ook  ’n dag vooraf berei word en dit is die soort ding wat belangrik is vir Callie. Soos ek hom ken, wil hy nie op die dag wat hy gaste ontvang  lank staan en kos maak nie. Hy wil bier drink en snert praat en simpel vrae vra soos wat het ons Kapenaars op ons hamburgers en toebroodjies en in ons slaaie geëet voor ons van roket gehoor het?"

Ek het die geurige geroosterde mossels beproef, want my oudste seun, nou agt, het op vier reeds met  ’n besoek aan Frankryk versot geraak op mossels, en ek word byna weekliks gevra om dit vir hom te maak.

Christine se idee is heerlik en vinnig met  ’n Weskusgeur. Bedruip jou halfskulp-mossels met brandsous (ek hou van soet rissiesous) en bak tot borrelend en goudbruin. Sit voor met heerlike koue witwyn.

O ja, en rol ’n bietjie verder af om te kyk hoe jy ’n eksemplaar van hierdie boek kan wen.

LIGGAAR GEROOSTERDE PEPERBEESFILET MET ’N ROKET-EN-PEPERWORTELSOUS

Genoeg vir 6 mense

53

FILET

1,2 kg beesvleisfilet, vliese verwyder (die filet moet heel wees, nie medaljons nie)

20 ml (4 t) olyfolie

3 knoffelhuisies, fyn gekap

baie swartpeper

slaaiblare vir voorsit

ROKET-EN-PEPERWORTELSOUS

150 ml roketblare

50 ml geroomde peperwortel

2 knoffelhuisies

50 ml olyfolie

sout en swartpeper

20 ml (4 t) vars room

125 ml (½ k) Griekse jogurt

FILET

1 Meng die olyfolie, knoffel en swartpeper en vryf die filet daarmee in. Laat 1 uur marineer.

2 Voorverhit die oond tot 200 °C en plaas die filet in ’n oondroosterpan. Oondrooster 20 minute onbedek.

3 Laat 30 minute rus. 4 Geur met sout. 5 Sny in papierdun skyfies en sit voor op ’n laag slaaiblare saam met die sous. ROKET-EN-PEPERWORTELSOUS 1 Pols die roket, geroomde peperwortel, knoffel, olyfolie, sout, swartpeper en room saam in ’n voedselverwerker. Meng die Griekse jogurt met ’n lepel daarby in. Wenk Hierdie sous se geur ontwikkel beter as dit ’n dag voor die tyd gemaak word. Dit verdik taamlik en hou sowat vier dae goed in die yskas.

GEURIG GEROOSTERDE MOSSELS

Genoeg vir 6 mense as voorgereg

125 ml (½ k) mayonnaise van ’n goeie gehalte

5 ml (1 t) tabascosous

5 ml (1 t) gekapte brandrissie

5 ml (1 t) knoffel-en-kruie-geurmiddel

15 ml (1 e) soet rissiesous

500 g bevrore mossels in halfskulpe, deeglik afgespoel en ontvries

1 Voorverhit die oond tot 180 °C. 2 Meng die mayonnaise, tabascosous, brandrissie, geurmiddel en soet rissiesous saam. 3 Bedek elke mossel met ’n teelepel van die mayonnaisemengsel. 4 Plaas die mossels op ’n bakplaat en bak sowat 10 minute, of tot dit bo-op borrel en goudbruin gebak is. 5 Sit dit warm of koud voor. WEN! Twee gelukkige lesers sal ’n eksemplaar van Elke Dag Koningskos present kry. SMS jou naam, van, adres en antwoord op ons vraag voor 17:00 op 4 Oktober na  34922 om vir die geskenk in aanmerking te kom. Elke SMS kos R1,50 en jy kan soveel keer SMS as wat jy wil. Vraag: Deur watter streek in Suid-Afrika is Elke Dag Koningskos geïnspireer? Dalk het jy al die heerlike Duitse gereg Flamkuchen by kostentoonstellings en kosmarkte  raakgeloop. Dis familie van die pizza, maar het ’n baie dun en krakerige basis. Flamkuchen (ook Flammkuchen gespel) werk goed in langwerpige vorms en is volmaakte markdagkos omdat dit lekker lig is en enige bolaag goed hanteer. Die basis van die bolaag is gewoonlik crème fraîche. Maak jou eie met die heerlike resep hieronder, en as jy sukkel kan jy gerus na die (Engelse) video kyk vir ekstra hulp. Jy sal nie spyt wees nie! Die resep kom uit ons boek Markdag.

Marie-Louis

FLAMKUCHEN

BASIS

125 ml (½ k) louwarm water

1 pakkie (10 g) kitsgis

5 ml (1 t) suiker

125 ml (½ k) melk, teen kamertemperatuur

30 ml (2 e) olyfolie

280–350 g koekmeel

BOLAAG

2 knoffelhuisies, fyn gekap

2 houertjies (250 g elk) crème fraîche

125 g gruyèrekaas, in skaafsels gesny

12 snye serrano-ham

1 ui, in dun skywe gesny

wilderoket-blare vir garnering

BASIS

1 Gebruik die mengbak en spaanhegstuk van ’n elektriese menger. Stel die menger op ’n  lae spoed en meng die water, kitsgis, suiker, melk, olyfolie en sout 1 minuut saam.

2 Voeg 2 koppies (280 g) van die meel by.

3 Bedek die bokant van die bak in die rondte om met ’n teedoek om te voorkom dat die beslag te veel spat. Meng 3 minute teen medium spoed om ’n sagte deeg te vorm. Voeg nog meel by indien nodig.

4 Bestuif jou werkoppervlak liggies met meel en keer die deeg daarop uit. Knie die deeg 6–8 minute terwyl jy meel soos nodig byvoeg tot die deeg glad en elasties is.

5 Smeer ’n groot bak met olie, plaas die deeg daarin en bedek met kleefplastiek. Laat 45-60 minute op ’n warm plek vir sodat die deeg kan rys tot dubbel die volume.

6 Voorverhit die oond tot sy hoogste stelling. Smeer ’n groot bakplaat baie liggies.

7 Druk die deeg plat en verdeel in 8 gelyke dele.

8 Bestuif ’n werkoppervlak liggies met meel en rol elke stuk deeg baie dun daarop uit, ongeveer 2 mm dik. Plaas twee of drie stukkies op ’n slag op die voorbereide bakplaat (of hoeveel ook al daarop pas) en bak 8–10 minute of tot die basis bros en goudbruin is.

BOLAAG 1 Roer die knoffel deur die crème fraîche. Smeer dit oor die uitgerolde deeg. 2 Besprinkelmet die kaasskaafsels. 3 Voeg die ham by en plaas die uie bo-op. 4 Garneer met roketblare sodra die Flamkuchen uit die oond kom. Wenke Jy kan enige bolaag van jou keuse gebruik. Indien nodig, kan jy die Flamkuchen terug in die oond druk nadat jy die bolaag bygevoeg het. Jy kan die Serrano-ham eintlik met enige goeie gerookte ham vervang. Ons is gek oor prosciutto en swartwoudham. Hierdie video wys stap vir stap hoe om Flamkuchen te maak.  Mari-Louis Guy is ’n vryskut-kosstilis en kosboekskrywer wat saam met haar broer, Callie Maritz, onder die naam Cakebread werk. Deel jou ervarings en resepte met haar by cakebreadct@gmail.com of vind haar op Facebook. Gaan loer gerus ook na voorbeelde van haar en Callie se werk vir Checkers: kaas-en-aartappelgebak en kaas-en-kruie-omelet. Bel Callie gerus by 072-284-1266 vir besprekings of besigheidswerk.