Petroldiewe het ’n lekkasie veroorsaak in Alberton, suid van Johannesburg, sê Gautengse verkeersbeamptes.

“Misdadigers het na bewering petrol uit pyplyne probeer steel wat die lekkasie veroorsaak het en die hele Ou Vereenigingpad is nou onveilig,” sê  Obed Sibisa, ’n woordvoerder.

Dit blyk die diewe het die ondergrondse pyplyn gebreek terwyl hulle dit opgegrawe het. Die brandstof het oor ’n groot oppervlak uitgeloop.

Geen verdagtes is nog in hegtenis geneem nie.

“Ons waarsku motoriste en padgebruikers teen verkeersontwrigtings weens die sluiting van Ou Vereenigingpad tussen Kliprivierpad en JG Strydom in Alrode.” Motoriste kan die R59 as ’n ompad gebruik.

Inwoners van die omliggende gebiede is ook gewaarsku om liefs nie vuur te maak nie. “Die owerheid is besorg dat die brandstof dalk aan die brand kan slaan.”

Die gebied is met ’n poeieragtige stof behandel om die vlambare vloeistof te neutraliseer. – Sapa