Die gewilde TV-persoonlikheid het in ’n Amerikaanse televisieprogram vertel sy was onlangs vir die sangeres Tina Turner se troue in Switserland. In Zürich het sy by ’n deftige boetiek ingestap en gevra om na ’n handsak te kyk.

Die winkelassistent het haar blykbaar nie herken nie en geantwoord: “Nee, dis te duur.”

Toe Winfrey daarop aandring, het die assistent glo weer gesê: “Nee, nee, jy wil nie na daardie een kyk nie, want dit sal te veel kos. Jy sal dit nie kan bekostig nie.”

Winfrey, ’n miljardêr, wou nie die winkel se naam noem nie.

Sy het gesê sy het nie ’n bohaai gemaak nie, maar die winkel net verlaat.

Volgens ’n berig in die Londense Independent het Trudie Goetz, eienaar van die winkel, om verskoning gevra en dit ’n “misverstand” genoem.