Vandat sy vrou ’n week tevore in die hospitaal opgeneem is, groet hy haar elke aand asof hy haar nooit weer gaan sien nie.

Vanaand doen hy dit weer. Die komedieskrywer en akteur Willie Esterhuizen (55) het drie moeilike jare agter die rug. Slukdermkanker is in 2006 by sy vrou, Glen (55), gediagnoseer en die kanker het na haar longe versprei. Hy kan sien die einde is naby.

Daarom groet Willie vanaand weer vir Glen asof dit die laaste keer gaan wees. Willie ry terug huis toe in Saxonwold, Johannesburg. In die nag verswak Glen se toestand. Toe die hospitaal hom bel om te sê die einde is naby, jaag Willie daarheen. Maar toe is daar net ’n leë bed. En Willie weet: Net so is sy geliefde ballerina uit sy lewe verwyder.

Hy onthou hul eerste ontmoeting baie goed. Sy was ’n baie talentvolle ballerina wat van Engeland hierheen gekom het, en hulle het saam by Kruik-Ballet gedans. Ja, die potjierol-akteur wat ons as Worsie van Vetkoekpaleis vermaak het, was eers ’n balletdanser.

Maar Glen was verloof en Willie wou nog drama studeer. Uiteindelik is hy by die drama-en-balletskool Arts Education in Londen aanvaar, waar hy twee jaar studeer het. Dit het broekskeur gegaan. Hy het Glen se tante raakgeloop en sy bied hom toe haar woonstel aan.

Toe Willie terugkeer na Suid-Afrika en hoor Glen is geskei en soek blyplek, bied hy sy voorste slaapkamer vir haar aan om dankie te sê vir haar tante se gasvryheid. “Een aand toe ek tuis kom, het sy in trane op haar bed gesit. Toe ek vra hoekom sy huil, sê sy: ‘Omdat ek lief is vir jou, jou simpel.’ Dié aand het ek in die voorste kamer ingetrek en nooit weer uitgetrek nie.”

Sy was drie maande swanger met hul eersteling, Toby (30), toe Willie met sy “beste vriendin” getroud is.

Hulle het ook ’n dogter, Teya (28).

Maar nou moet die lewe voortgaan en Willie is druk besig om die nuwe reeks van sy gewilde TV-komedie Molly en Wors te skryf.

Lees die volledige artikel in Huisgenoot van 18 Februarie.