’n Verbysterende 9 miljoen Suid-Afrikaners ly gereeld aan hoofpyn, en pleks van die probleem probeer oplos, gebruik baie slegs nievoorskif-medikasie wat tot medikasie-oorgebruikshoofpyn (MOH) kan lei.

Dié statistieke is onlangs deur The Headache Clinic bekendgemaak, wat takke in Johannesburg, Durban en Kaapstad het. Dr. Elliot Shevel, ’n chirurg en die mediese direkteur van die kliniek, sê daar is in ’n onlangse studie bevind dat byna 16% van Suid-Afrikaners gereeld hoofpyn kry. “Mense minag hoofpyn steeds as ’n ernstige gesondheidsprobleem. As ’n samelewing skenk ons nie genoeg aandag aan hoofpyn en migraine nie, ook nie die impak wat dit op mense se lewe nie. Dit word te dikwels as iets onbelangriks afgemaak. Navorsing toon ook dat die syfers konsekwent is oor alle rasse, kulture en inkomstegroepe heen. Migraines diskrimineer nie,” sê dr. Shevel.

Hy verduidelik dat wanneer gewone hoofpyn slegs met pynmedikasie behandel word, veral met dié wat kafeïen of kodeïen bevat, kan dit ’n toestand veroorsaak wat as MOH bekendstaan. “MOH is nie net verwant aan nievoorskif-medikasie nie,” sê dr. Shevel. “Volgens ’n onlangse studie kom die potentste vorm van MOH voor by die gebruik van triptans, ’n soort medikasie wat spesifiek vir migraine voorgeskryf word. Enige medikasie of sogenaamde migraine-stel wat ergotamien bevat, is ook ’n rede tot kommer.”

Dr. Shevel meen die meeste hoofpyne ontstaan uit een van drie plekke: die kaak- en nekspiere, are in die kopvel of senuwees wat na die kopvel lei. “Dit is belangrik om ’n multidissiplinêre benadering te neem wanneer elke lyer se migraine-kaart ontdek word.”

Hy sê behandeling moet gebaseer word op akkurate identifisering van die onderliggende strukturele oorsake in elke individuele pasiënt. Hy voeg by dat dieet, postuur, oefening en lewensgehalte ook oorweeg moet word.

Besoek theheadacheclinic.net vir nog inligting oor die behandeling van hoofpyn sonder medikasie.

Volg ons gerus op Facebook en Twitter en kom speld saam op Pinterest.