HULLE is die grootste kleinhandelaar ter wêreld.

Hul koopkrag laat mededingers bewe, hul jaarlikse verkope is drie keer ons nasionale begroting, vier van hul stigter se nasate is onder die 20 rykste biljoenêrs wêreldwyd.

As hulle ’n land was, sou hulle onder die top-30 ekonomieë internasionaal wees.

Hulle woel reeds in 14 ander lande nadat die ganse Amerika in hul ‘‘Save money. Live Better’’- logo getooi is. En nou mik hulle hierheen.

Ja, die Amerikaanse winkelreus Walmart wil in Suid-Afrika kom sake doen.

Ekonome en sakeleiers jubel, maar daar is ook kommer dat die koms van die ‘‘Beast of Bentonville’’ dalk ons plaaslike werkers, verskaffers en vervaardigers lelik kan seermaak.

Die vakbondreus Cosatu vra reeds ’n veldtog teen die ‘‘Walmart-isering’’ van ons kleinhandelsektor . . .

Die blote feit dat Walmart na Suid-Afrika wil kom, moet Suid-Afrikaners klaar laat goed voel – dit sê goeie dinge van die huidige stand van ons ekonomie.

Hul toetrede tot ’n land is dikwels ’n teken dat daardie ekonomie aan’t groei is. Dertien van die lande waar dié groep

met sy hoofkwartier in Bentonville, Arkansas, in die afgelope 20 jaar sake begin doen het, het ’n ekonomiese opbloei ervaar.

Kortom, hulle het ’n goeie neus vir ekonomiese vooruitgang. En met versadigde markte en swak ekonomiese groei in die ontwikkelde wêreld kyk Walmart lankal na ontluikende markte soos ons s’n nou, om geld te maak.

Hulle het sowat R30 biljoen aangebied vir Suid-Afrika se Massmart-groep, wat onder meer Game, Makro, Dion

Wired en Builders Warehouse bedryf.