Die Switserse tennisspeler Stanislas Wawrinka (28) het sy eerste Grand Slam-titel Sondag gewen toe hy ’n beseerde Rafael Nadal in die eindstryd van die Australiese Ope klop.

Hy was aan die begin van die toernooi agtste op die wêreldranglys, maar het intussen opgeskuif na die derde plek op die enkelspelranglys. Hier is vyf feite oor die nuwe tenniskampioen:

  1. Hy het ’n tatoe op sy linkervoorarm. Dis ’n aanhaling van die Ierse digter Samuel Beckett: “Ever tried. Ever failed. No matter. Try Again. Fail again. Fail better.” Sy vierjarige dogtertjie Alexia se naam is op sy hand getatoeëer.
  2. Hy het op agt begin tennis speel.
  3. Die tennislegende John McEnroe is ’n aanhanger en sê die Switserse speler “het die beste eenhand-handrughou in die spel op die oomblik”.
  4. Hy is getroud met die Switserse TV-aanbieder Ilham Vuilloud. Hulle is in 2011 uitmekaar, maar het intussen versoen geraak.
  5. Hy is ’n Olimpiese kampioen; hy het goud by die Olimpiese Spele in Beijing in 2008 in die dubbelspel gewen. Hy het saam met sy vriend en landgenoot Roger Federer gespeel.

- Petro-Anne Vlok

BRONNE: metro.co.uk, espn.go.com, atpworldtour.com