Die vrou wat die voordeur oopmaak, borrel oor van lewenslus. Joviaal nooi sy ons kombuis toe, want dis haar kuierplek, verduidelik sy terwyl sy die koffiemaker aanskakel.

Op die oog af lyk Retha Sisler (50) blakend gesond en sorgeloos, so asof sy nie al 15 jaar lank met ’n gevreesde en aftakelende siekte saamleef nie. Sy is een van die sowat 5 000 Suid- Afrikaners wat aan veelvuldige sklerose (VS) ly – ’n ongeneeslike siekte wat die senustelsel so erg beskadig dat dit nie die brein se boodskappe behoorlik kan oordra nie.

Dan reageer die liggaam óf verkeerd óf glad nie daarop nie. Dit is dan dat lyers op ’n dag in ’n tafel vasloop, soos al met Retha gebeur het. “Dit is nie dat ek nie die meubels kon sien nie, my liggaam wou net nie na my brein luister en om die tafel loop nie,’’ sê sy.

Tog het hierdie voormalige restauranteienaar, onderwyser en later hoërskoolhoof van Pretoria besluit sy sal haar nie daardeur laat onderkry nie. Terwyl sy self nog elke dag teen die siekte stry, sien sy kans om ’n gratis steundiens vir ander lyers te bied.

Die naam, MS Is Living with ME, beskryf haar standpunt oor die siekte, verduidelik sy.

Sy vergelyk die siekte met ’n ongewenste gas wat ongenooid op jou voorstoep opdaag, homself in jou huis tuismaak en nooit weer weggaan nie.

Lees die volledige artikel in die Huisgenoot van 10 Junie 2010.

Bespreek vir Skouspel!