Hulle is nie net wonderlike drafmaats of snoesige troetelmaatjies in daai koue winternagte nie; nou kan jy en jou beste viervoetige vriendin ook saam jul naels laat versorg!

’n Twitter-gebruiker het onlangs ’n kiekie gedeel van haar pers naels met blinkertjies langs haar slapende kat se pote, waarvan die naels identies versier is.

Haar byskrif by die foto het gelui “BFFs” en die internet het wild geraak met antwoorde. 

Ander gebruikers het vinnig gereageer met foto’s van hulle en hul hond of kat, en die naels is ook eenders versorg.

Maar voor jy dit oorweeg om jou geliefkoosde naellak te gryp en dit aan jou geliefde brak se naels te tik, onthou net naellak is giftig vir diere. 

Die beste alternatief sal naeldoppe wees wat katte gewoonlik kry sodat hulle nie kan krap nie.

Naeldoppe word grootliks afgekeur, want hulle verhinder ’n kat om iets te doen wat in sy aard is en dit word wyd as wreed beskou.

“Dis wonderlik dat mense gehaltetyd saam met hul troeteldiere deurbring, maar dis belangrik dat eienaars verstaan sommige pogings om hulle te ‘pamperlang’ kan ’n kat of hond verwar of verskrik laat,” het ’n woordvoerder vir die vereniging vir die voorkoming van wreedheid teenoor diere in die Verenigde Koninkryk, aan Metro.co.uk gesê.

“Hoewel ons dit geniet om ons naels te verf en juweliersware te dra, verstaan troeteldiere nie wat met hulle gebeur of hoekom nie, en sommige kan dit ontstellend vind.”

Die Suid-Afrikaanse Dierebeskermingsvereniging (DBV) stem heelhartig hiermee saam.

Die DBV sê in ’n verklaring oor hul ontklouingsbeleid dat dit “gekant is teen die onnodige verminking van diere – vir kosmetiese, sport, vermaaklikheids- of geriefsdoeleindes – insluitend, maar nie beperk nie tot die verwydering van hul sterte, die knip van ore, operasies om weefsel van die stembande te verwyder sodat honde sagter blaf en ontklouing.”

Al is dit dus hoe ’n oulike prentjie om bypassende naels met jou beste-troetelvriend te hê, moet jy dalk twee keer dink voor jy daardie nael-afspraak maak.

Bronne: Metro, Mashable, nspca