Daar’s jou storie oor vroue wat meer van huiswerk as van seks hou?” wil my nuusredakteur weet. Ek’s op my knieë besig om die stortteëls met ’n tandeborsel blink te poets. “ ’Skuus, is nog besig met navorsing. Amper klaar met die badkamer, dan’s dit net nog die yskas en die vensters. Byt vas, dit kom,” SMS ek terug.

Vroeër wou ek uitasem weet of ek die seksdeel van die navorsing ook op die proef moet stel. En kan Huisgenoot dalk Suid-Afrika se mooiste en bekendste swemmer vra om deel van die eksperiment te wees...?

Ná beraadslaging is besluit om Mnr. Blokkiesmaag nie te betrek nie. Dit sou die geloofwaardigheid van ons ondersoek belemmer. Enige vrou wat huiswerk plesieriger vind as om saam met só ’n Adonis in die kooi rond te rol is sertifiseerbaar gek.

Die vroue aan die stuur van Huisgenoot dink in elk geval die Britse Evas wat in die navorsing sê hulle hou meer van huisskoonmaak as seks, is effe koekoes. “Dis seker omdat Britse mans so vaal is dat ’n derde van Britse vroue eerder na die Handy Andy gryp,” giggel ’n kollega.

Maar al kan jy kwalik Suid-Afrikaanse mans as vaaljapies beskryf, is dit ’n feit dat vroue hier steeds meer huiswerk doen as mans. En dis seker nie onmoontlik dat sommige van hulle dit genotvoller vind as seks nie. Of ten minste terapeuties.

Was Amor Vittone nie hoeka besig om skottelgoed te was toe Joost kom bely het oor sy buite-egtelike kafoefelry nie? Pleks dat sy hom met ’n mooi skoon gewaste bord gegooi het...

Die probleem – én die lekkerte – van navorsing is dat jy eintlik enigiets kan bewys.

Lees die volledige artikel in die 11 Maart-uitgawe van Huisgenoot.

Stem jy saam? Verkies jy huiswerk bo seks?

Bespreek vir Skouspel!