Daar is groot fout in ons samelewing as vroue en kinders in vrees moet lewe.

Dit is die mening van Lulu Xingwana, die minister van vroue, kinders en gestremdes, nadat klein Jasmin Lee Pretorius (4) se vermeende moordenaar vanoggend vlugtig in die landdroshof in Brakpan verskyn het.

Die 23-jarige beskuldigde, ’n familielid van Jasmin Lee, moet Maandag weer in die hof verskyn. Die saak is uitgestel sodat hy vir hom regsverteenwoordiging kan kry.

Jasmin Lee, wat môre begrawe word, se lykie is verlede Saterdag onder die verdagte se bed in ’n woonstel in Brakpan gekry. Die man het die woonstel gedeel met sy lewensmaat, Jasmin Lee se pa, Morné Pretorius, en nog twee familielede.

Motalatale Modiba, Xingwana se woordvoerder, sê hulle verwelkom adv. Mxolisi Nxasana, die nasionale direkteur van openbare vervolging, se versekering buite die hof dat die staat ’n sterk saak het en hoop die verdagte word lewenslange tronkstraf opgelê.

Dit sal ’n sterk boodskap uitstuur aan vroue- en kindermishandelaars, veral in die lig van die groot getal voorvalle wat sedert die begin van die jaar aangemeld is waar vroue en kinders erg beseer, verkrag of vermoor is.

“Ons is daarvoor verantwoordelik om na ons kinders te kyk en die swakkes in die samelewing te beskerm. Maar daar is nie plek in die samelewing vir mense wat vroue en kinders mishandel nie,” sê Modiba.

Modiba sê die enigste oplossing is dat mense moet hulp kry. As jy agterkom of vermoed daar is ’n probleem, gaan kry hulp. As jy in ’n situasie is waar jy of jou kinders mishandel word, kry hulp: Daar is mense wat jou kan help om uit die situasie weg te kom.

- Hilda Fourie