Kelly Fine het ’n bietjie meer gekry as wat sy verwag het toe sy vir aandete by ’n Japannese restaurant stilhou. Dit was veronderstel om ’n rustige aandete te wees, maar dinge het ’n dramatiese wending geneem toe die kopieskrywer ooggetuie word van sekerlik een van die vrotste afsprake in die geskiedenis. En sy het regstreeks oor die hele affêre getwiet. “Hier is ’n paartjie op hul eerste afspraak by hierdie soesji-plek en die kêrel het aangekondig: ‘Ek kyk nie na spyskaarte nie. En ék sal vir ons bestel.’ ” begin sy die draad.

Hiervandaan gaan dinge natuurlik net afdraande: “Nou vra hy vir die soesji-sjefs of hulle ander vis het. Hulle het nie wat hy wil hê nie, en dit gaan ’n groot probleem wees,” skryf sy. “As hy tog maar net voor die tyd kon geweet het.”
Daarna wip die snaar hom toe die kelnerin wil weet watter wyn hy wil hê. “Jy is die kenner, sê jy my.”
Toe wil hy by die meisie weet of sy droë wyn wil hê. Maar sy was lus vir saki, wat hom verder laat uitvaar het: “Liefie, ek kan nie ál die besluite vir ons maak nie.” Waarop sy onseker antwoord: “Saki . . .?”
Die buffelagtige romeo het toe sy naam nog verder krater gemaak deur eers die sjef en daarna die kelnerin te vra of die plek reusemossels voorsit. Albei het gesê nee. Maar soos hy (weer!) sê, hy “kyk nie na spyskaarte nie”.

via GIPHY
Die arme kelnerin begin toe maar die spyskaart aan hulle voorlees. Dit het nie gelyk asof dit die meisie veel skeel nie, maar toe sy durf waag om weg te kyk, was die man weer gou op sy perdjie: “Kyk na my. Moenie doer kyk nie, kyk na my.” Hy het ook iets kwytgeraak wat Kelly liewer nie wou herhaal nie, maar wat begin met: “Enige blonde vrou wat na my kyk . . .”
“Hy het gevra vir diepgebraaide garnaalkoppe,” twiet Kelly. “Hulle het dit nie. Kelnerin: ‘Wil jy ’n spyskaart hê?’ Ek en hy saam: ‘Ek kyk nie na spyskaarte nie.’ ”
Kelly merk toe op die meisie dra ’n ring en die man nie. Sy sê sy het sommer lus gevoel om vir die meisie te gaan sê ’n huweliksertifikaat is net papier en sy kan hom los.
In hierdie stadium mis Kelly iets wat die ou sê, maar hy sluit dit af met: “Dit is hoekom julle albei so ongelukkig is. Plaas dit maar agter in jou klein koppie.” Daarna volg hy op met: “Ek gee nie om wat mense sê nie. Woorde maak nie saak as jy hulle nie mag gee nie.” Kelly mor dan dat sy self nogal ’n paar “magtige woorde” vir hom het.
“Nou praat hy oor hoe skreeusnaaks dit gaan wees wanneer hy sy MAGA-hoed (kort vir Make America Great Again) voor sy “vriend, ’n Jood”, dra. Die mag nie sy huis binnekom sonder ’n hoed nie.
Toe die kos eindelik kom en die meisie vra of hy haar gaan sê wat dit is, antwoord die nors vent net: “Nee, eet jy dit maar net.” Maar moenie dink hy laat haar toe om dit met eetstokkies te eet nie. Dié is uit haar hand geklap met ’n norse: “ ’n Mens eet nie soesji met eetstokkies nie!” Toe sy ’n tweede keer probeer, sê die man sy moet hom nie in die verleentheid stel nie.
Die kelnerin het Kelly intussen aangepor om te gaan, maar sy kon dit nie oor haar hart kry nie. En net daarna laat val hy sommer so terloops dat een van sy “broers” – vermoedelik gebruik hy dié woord vir sy vriende – in die tronk sit vir nie minder nie as 25 moorde.
via GIPHY
Toe kom die restauranteienaar by die tafel hallo sê, want hy ken die meisie. Sy stel haar metgesel voor as Tony. Dié kom dadelik na die punt toe deur die oorblufte restaurateur te vra hoekom die plek nie reusemossels het nie.
Daarna is Tony vort om ’n sigaret beter te leer ken. En Kelly is vort met ’n ellelange lys baie deelbare twiets agter haar naam. “Dankie dat julle ingeskakel het! Ons het dit gemaak!” twiet sy.
via GIPHY

Wat sou jy gedoen het?

via GIPHY