Dis vyf weke sedert hy laas in sy eie bed geslaap het, vyf weke sedert hy sy wasgoed kon was. Deesdae gaan koop Gerhard Steyn maar nuwe klere in die naaste winkelsentrum. “R20 000 s’n die afgelope maand,” sê die sanger met ’n verdwaasde laggie.

Die sanger van die reuse treffer Baby Tjoklits is deesdae min by die huis. Hy ry maar ’n ekstra paar stewels en ’n sak vol klere saam in die kattebak van sy slap wit Mercedes en slaap in hotelle of gastehuise waar hy kom vir sy optredes.

Daar was ook die afgelope tyd aande op die rusbank in die ateljee waar hy pas sy nuwe album opgeneem het.

“Ek het onlangs drie nagte ná mekaar glad nie geslaap nie,” vertel hy. “Dikwels slaap ek net twee uur per nag.”

Dit moet jy maar weet: Daar’s niks wat ’n man se roetine so omvergooi soos ’n liedjie wat oornag almal se gunsteling word nie. Dis wat Baby Tjoklits in Gerhard se lewe veroorsaak het. Hy het maande laas ’n leë kolletjie in sy dagboek gehad en is reeds vir die res van 2010 vol bespreek.

Almal wil die blonde sanger hoor, almal wil sien hoe hy op die verhoog lostrek met: “Baby, ek like jou nes jy is, my hart klop tjoklits as jy naby is...” En almal sing saam.

Lees die volledige artikel in die Huisgenoot van 29 April 2010.

Wen

Tien lesers kan Gerhard Steyn se CD Als Begin Eers Nou, wen. SMS GERHARD, jou naam en adres voor 6 Mei om 17:00 na 34922. Elke SMS kos R2.