Plaas jy gereeld foto’s van jou en jou geliefde op Facebook?

Los jy liefdesboodskappe oral op jou maat se muur of sê gereeld hoe wonderlik jou beter helfde is? Pasop!

Volgens ’n onlangse studie van mense jonger as 30, wat deur die Albright College in Pennsilvanië gedoen is, maak dié met ’n baie swak selfbeeld hulle daaraan skuldig.

Dié soort mens is meer daartoe geneig om oor hul liefdesverhouding op Facebook uit te praat.

Mooi foto’s van verliefdes word gereeld op die sosiale netwerk gedeel en hul liefde word elke dag aan hul vriende bekendgemaak.

Inskrywings soos “Hy is die beste kêrel ter wêreld!” of ander vreugdevolle boodskappe is tipiese voorbeelde van ’n persoon wat min selfvertroue in en ’n lae selfbeeld oor hul verhouding het.

Luidens die studie is introverte ook meer geneig om oor hul verhouding te pronk; daarteenoor is ekstorverte eintlik gemakliker daarmee om inligting persoonlik met ander te deel.

Mense wat elke dag ook baie negatiewe emosies ervaar, is meer geneig om hul maat se aktiwiteite op Facebook dop te hou.

Volgens die studie is dit omdat paartjies Facebook gebruik om hul eie vrese en gevoelens van verwerping te verminder of te ignorer.

“Die studie se uitslae bewys dat die mense eintlik net aan hulself, hul maat en ander wil bewys dat dit met hul verhouding goed gaan,” sê Gwendolyn Seidman, ’n mede-dosent in sielkunde by die kollege.

Bron: www.mailonline.com