Die gewilde Kaapse sanger, Alistair Izobell, het ’n musiekvideo van kykNET se gewilde sepie, Suidooster, se temalied opgeneem. In dié video, wat op die stelle van Suidooster by Atlantic Studios geskiet is, verskyn van die akteurs ook.

“Alistair Izobell is een van ons land se veelsydigste en dinamiese kunstenaars, daarom is dit so gepas dat hy die temalied van Suidooster, wat hy geskryf het, ook sing. kykNET deel graag hierdie musiekvideo met al sy aanhangers en Suidooster-kykers,” het Karen Meiring, direkteur van Afrkaanse kanale by M-Net, gesê.

Die musiekvideo is binne ’n dag by Suidooster se ateljee, net duskant Milnerton in Kaapstad, geskiet.

“Dis vir my so groot voorreg om met Suidooster geassosieer te word, want dis waarlik ’n program wat die Kaap en sy mense verteenwoordig,” sê Alistair.

“Die suidooster is immers ook die Kaapse Dokter, en ek hoop die temalied en musiekvideo laat mense ook altyd beter voel.”

Volgens Paul Venter, een van Suidooster se vervaardigers, het kykers aanhoudend sedert die depie sowat vier maande terug begin het, gevra wanneer hulle ’n musiekvideo van die temalied kan verwag.

“Alistair is ’n legende in die Kaap en kaartjies na sy vertonings verkoop soos soetkoek! Hy is vir Kapenaars so Kaaps soos die suidooster, en daarom het ons hom ook gekies om die temalied te skryf en te sing.”

“Met dié musiekvideo stel kykNET Alistair aan alle Suid-Afrikaners bekend,” sê Paul.

Lees ook op Huisgenoot.com:

Tokai-vier stel nuwe eise kort voor tweede hofverskyning

Derick se roerende brief aan Joost

Wanhopige ouma se ope brief: ‘Help! My kleinkind is ’n bedorwe brok!’

Dis waarom jy nooit aartappels in die yskas moet hou nie

‘Ek hou jou dop!’: Man vind onheilspellende 15 jaar oue boodskap in sy kaggel

Massamoordenaar Anders Breivik kla oor ‘onmenslike toestand’ van sy tronksel