Die wêreld se eerste veiligheidstelsel vir grafstene gaan vroeg volgende jaar in Suid-Afrika en die Verenigde Koninkryk bekendgestel word om die hoë voorkoms van grafskending en –diefstal te bekamp.

Volgens Mark Pringle, die bestuurder van Chaldean Trading, die maatskappy wat die veiligheidstelsel vir grafstene ontwikkel, is grafsdiefstal ’n groot probleem in Suid-Afrika. Sowat 20 grafstene is byvoorbeeld in die eerste twee weke van November uit die Avalon- en West Park-begraafplase in Johannesburg gesteel, berig Timeslive.co.za.

“Grafskending en –diefstal het ’n ongelooflike uitwerking op die naasbestaandes,” sê Mark aan Huisgenoot. “Grafstene het ’n kulturele, emosionele en finansiële waarde; daarom is dit traumaties vir die naasbestaandes wanneer hulle ontdek hul geliefdes se grafstene is gesteel.”

Hy verduidelik die nuwe stelsel, Memorial Alert, sal in granietgrafstene ingeplant word; dit kan nie met die blote oog gesien word of daaruit gehaal word nie.

“Enige ongemagtigde peutery met die grafsteen sal ’n reeks alarms laat lui,” verduidelik Mark. “Eerstens sal ’n harde sirene in die begraafplaas lui om werknemers in en die bestuur van die begraafplaas in kennis te stel.

“Tweedens sal verskeie SMS’e na familielede gestuur word om te laat weet dat daar met die grafsteen gepeuter word. Die SMS-kennisgewings kan ook aan ’n veiligheidsfirma gestuur word sodat hulle daarop kan reageer.

“Omdat die meeste grafstene groot en swaar is en dus nogal tyd en moeite verg om te steel, glo ons dat oortreders nie genoeg tyd sal hê om die grafsteen te steel wanner die alarm afgaan nie.”

Die koste van die diens sal eers vroeg volgende jaar bekendgemaak word. Daar is geen maandelikse koste nie, slegs ’n eenmalige bedrag, en die battery van die stelsel sal teen ’n minimale bedrag elke drie jaar vervang moet word.

Mark voeg by dat grafstene met die Memorial Alert-stelsel ook verseker kan word.

– Christiaan Boonzaier