Die graderingsmaatskappy Standard & Poor's het die besluit geneem om die land na ’n nie-beleggingsgradering af te gradeer. Tot nou toe het Suid-Afrika benoud aan ’n baie dun takkie slegs een kerf bo die nie-beleggingsgraad vasgeklou.

Die maatskappy is van mening dat die verdeling in die regering onder die verdeelde ANC-bewind tot veranderinge aan die uitvoerende leierskap gelei het.

Dié rommelstatus-besluit is geneem na die middernagtelike skuiwery van Donderdagaand tot Vrydagoggend waartydens die minister van finansies, Pravin Gordhan en sy adjunk Mcebisi Jonas se koppe gerol het.

Wat beteken rommelstatus vir die land?

Dit beteken Suid-Afrika “moet ’n groter premie betaal om geld in die buiteland te leen. En as ’n regering dan dermiljoene gaan leen vir byvoorbeeld ’n kernkragprojek, maak dit daardie projek soveel duurder . . . as Eskom geld teen duurder koerse gaan leen om sulke sentrales te bou, betaal ek en jy as verbruikers natuurlik meer vir elektrisiteit.”

Rommelstatus, verduidelik die ekonoom Ulrich Joubert, beteken in die kort termyn stellig ’n nog swakker rand en dat verbruikers uiteindelik duurder sal betaal vir alles wat ingevoer word, insluitend kos om moontlike misoeste aan te vul, en mettertyd brandstof, al is daar tans nog ietwat van ’n oorverhaling daarop.

Rentekoerse kan ook in die gedrang kom.

Bykomende bron: Fin24