Meisies wie se ouers of vriende sê hulle is “te vet” teen die ouderdom van 10 is minder geneig om gewig te verloor en het ’n hoër risiko om as volwassenes vetsugtig te wees, is in ’n Amerikaanse studie bevind.

Wetenskaplikes aan die Universiteit van Kalifornië het afmetings en die liggaamsmassa-indeks (LMI) data van sowat 2 400 meisies van 10 jaar oud versamel.

Hulle het ook vir die kinders gevra of hul ouers, broers en susters, vriende, klasmaats of onderwysers hulle al een keer of herhaaldelik as te vet beskryf het. Die meisies se LMI is weer op 19 bepaal.

Die resultaat: In gevalle waar ’n familielid die 10-jarige as te vet beskryf het, het die risiko op vetsug op 19 met 62 persent toegeneem. Wat opmerkings van mense buite die familie betref, het daardie moontlikheid met minstens 40 persent gestyg.

Die verhouding is afhanklik van die LMI. Selfs meisies met ’n normale gewig was in meer gevalle later in hul lewe vetsugtig as hulle as kind negatiewe opmerkings oor hul lywe moes aanhoor.

Die navorsers het tot die gevolgtrekking gekom dat in plaas van dat dit gedrag verander, veroorsaak stigmatisering dat die meisies nie hul gedrag kan verander en hul gewig kan beheer nie. En vir dit om te gebeur, is daar nie eens ’n geterg nodig nie, maar bloot net die skynbaar onskadelike klassifisering dat hulle “te vet” is.

Hul welstand word so afgetakel en stres neem toe. Die meisies kan ook ’n vrees vir diskriminasie ontwikkel, waarvoor hulle dan sal opmaak deur nog meer te eet.

Klik hier vir maniere hoe jy jou kinders gesonde eetgewoontes kan leer.