"Studies wys Suid-Afrikaners is in ooreenstemming dat dié gemeenskap beskerm moet word", het Malusi Gigaba, die minister van Binnelandse Sake, Dinsdagoggend by die Parlement in Kaapstad gesê oor die regte van onder meer gay en lesbiese Suid-Afrikaners. Hy het beklemtoon dat Suid-Afrika hard moet werk om ons Grondwet se waardes te respekteer en gesê sy departement het meer as 60 000 stemme ontvang wat vra dat Steven nie Suid-Afrika moet besoek nie. Die leier van die Faithful Word-baptistekerk in Phoenix, Arizona, wou Suid-Afrika besoek om preke in Johannesburg aan te bied. Steven se preke sou op 18 September afskop en hy is aanvanklik 'n visum vir sy besoek toegestaan, maar hy het gou die wind van voor gekry, onder meer met petisies wat binnelandse sake vra om sy besoek stop te sit.

"Hierdie is nie 'n petisie teen Christenskap nie, maar teen iemand wat Christenskap gebruik as 'n verskoning om die dood van 'n samelewingsgroep aan te moedig en 'n boodskap van haat en onverdraagsaamheid te versprei," lui GaySA Radio se aanlynpetisie.

Ook plaaslike sakeondernemings soos die restaurante Wimpy en Spur het bekendgemaak Steven sal nie welkom wees by hul takke nie nadat hy gesê het hy beplan om "siele" by dié restaurante te gaan werf as deel van sy "soul winning marathon".

Steven het vroeër vanjaar die wêreld in oproer gehad toe hy in 'n video die anti-gay terreuraanval op 12 Junie vanjaar by 'n nagklub in Orlando, Amerika, geprys het. "Ek moedig nie geweld aan nie, maar die Bybel sê immers homoseksuele mense moet doodgemaak word.

"Die goeie nuus is daar is vyftig minder pedofiele in die wêreld, want dié gays is walglik en pervers," sê hy in dié omstrede video.

Hy het ook in 'n video waarin hy reageer op die Suid-Afrikaanse kritiek teen hom gesê Malusi is "agterlik" en gesê Suid-Afrika is 'n "demoniese vesting".

Kyk die video hier: