Die plaaslike koerant Roodepoort Record het op hul webtuiste gesê die tiener is by die Bosasa-jeugontwikkelingsentrum, waar hy geassesseer word.

Die Hoërskool Florida-leerder het na bewering Maandag sy 76-jarige ouma met ’n swaard gesteek en is Maandagmiddag by ’n vriend se huis in Georgina in hegtenis geneem.

Die seun is na die vriend se huis toe nadat hy sy ouma in die nek en borskas gesteek het, het Beeld berig.

Die seun se suster het haar in ’n vertrek toegesluit toe die seun sy ouma aanval en die huishulp het uit die huis gevlug.

Sy vriend het aan die Record gesê: “Sowel die dood en moord was fassinerende konsepte vir my vriend.

“Hy het altyd met agting van sluip- en reeksmoordenaars gepraat en het hom as ’n sluipmoordenaar beskou.”

Die seun het Woensdag vlugtig in die landdroshof in Roodepoort verskyn.

Sy prokureur, Aadil Lambat, het gesê die volgende hofdatum hang af van die uitkoms van die assessering en sal in die volgende week bevestig word.

- Sapa