Die seun (14) ly aan ’n seldsame fobie vir grootword, ’n sielkundige toestand waarvan daar nog net drie aangemelde gevalle was. Die seun is ook die eerste tiener by wie dit gediagnoseer is.

Die fobie, genaamd geraskofobie, is die akute vrees vir grootword omdat die lyer glo dat volwasse wees beteken jy het ’n groter kans om siek te word en dood te gaan. Hierdie gevoel is oorweldigend; daarom probeer hulle veroudering teenwerk.

Die seun se fobie het op 11 begin. Hy het besef dat die voedingstof in voedsel sy liggaam help groei; toe het hy stelselmatig ál minder begin eet. Hy het ook gebukkend geloop om sy ware lengte te versteek.

Dokters meen die seun se ma het hierdie vreemde gedrag aangehelp deur hom te paai, slaapliedjies vir hom te sing en sy klere elke dag uit te sit.

Navorsers skryf die toestand toe aan ’n mengsel van biologiese, psigologiese en omgewingsfaktore. Diagnose is ingewikkeld, veral omdat die onderliggende probleme eers uitgeken moet word.

Die seun kry nou behandeling en sy toestand het verbeter. Hy loop al regop, praat in sy normale stem en het 6 kg aangesit.

“Hy kan al ’n toekoms vir homself voorstel, maar voel steeds angstig oor die verantwoordelikheid van volwasse wees,” het een van sy dokters gesê.

Bronne: Yahoo News; Daily Mail