’n Suid-Afrikaans gebore wetenskaplike, wat gister die Nobel-prys vir chemie gewen het, het nie die telefoonoproep beantwoord wat hom van sy R4 miljoen-prys ingelig het nie omdat sy foon “nooit lui nie”.

Toe prof. Michael Levitt (66) se telefoon lui, het hy dit laat doodloop omdat hy meestal net teksboodskappe en e-pos kry.

“Ek was seker dis ’n verkeerde nommer,” het hy aan med.stanford.edu vertel. “Toe dit ’n tweede keer lui, het ek dit maar opgetel. Ek het dadelik ’n Sweedse aksent gehoor en opgewonde geraak – dit was asof ek vyf dubbel-espresso’s ingekry het.”

Hy is ingelig hy deel die Nobel-prys met nog twee wetenskaplikes, proff. Martin Karplus en Arieh Warshel, vir navorsing wat hy reeds tussen 1967 en 1975 voltooi het; dit kyk na die gebruik van rekenaars om proteïen-, DNS- en RNS-molekules, wat op ’n grondslagfase verantwoordelik is vir lewe, te ontleed.

Dié navorsing is belangrik om te verstaan hoe medisyne en proteïen op mekaar reageer en help om siektes te behandel, het Marinda Li Wu, die voorsitter van die Amerikaanse Vereniging vir Chemie, aan dailymail.co.uk verduidelik.

Michael is in Pretoria gebore en het daar grootgeword. Vanoggend het hy op die RSG-program Monitor vertel hy het ’n jaar aan Tukkies studeer, maar is op 16 na die buiteland, waar hy in Amerika, Engeland en Israel studeer het. Hy is nou verbonde aan die Stanford-universiteit se departement geneeskunde en deel Amerikaanse, Britse en Israelse burgerskap.

Hoewel hy nou voltyds in die buiteland is en daar saam met sy vrou van die afgelope 45 jaar, Rina, sy drie kinders en drie kleinkinders woon, het hy met sy groot prys nie sy geboorteland vergeet nie.

“Ek was al ’n hele paar keer terug; Suid-Afrika het ’n duidelike plek in my hart,” sê hy.

“Ek bly nog trots Suid-Afrikaans.”

Sy prys word amptelik in Desember in Stockholm aan hom oorhandig.

– Christiaan Boonzaier.