“Die uitslag van 2014 se Global AgeWatch Index bied ’n goeie geleentheid vir Suider-Afrikaanse regerings om dit te oorweeg om universele maatskaplike pensioene en toegang aan mense bo 60 beskikbaar te stel,” het die streekdirekteur vir suidelike Afrika, Necodimus Chipfupa, in ’n verklaring gesê.

Die 2014 Global AgeWatch Index lys 96 lande volgens die sosiale en ekonomiese welstand van ouer mense.

Noorweë het die beste gevaar, gevolg deur Swede.

Volgens statistiek wat in die indeks gebruik is, kry 9 uit tien (92 persent) Suid-Afrikaners bo 65 ’n pensioen.

Suid-Afrikaners wat 60 is, kan verwag om nog gemiddeld 16 jaar te leef, vergeleke met die 17 jaar wat hul eweknieë in ander Afrikalande in die indeks se verwagting is.

Volgens die wêreld-indeks kan 60-jariges gemiddeld nog 20 jaar leef.

Meer as vier uit vyf (83 persent) ouer Suid-Afrikaners het gesê hulle het iemand op wie hulle tydens ’n krisis kan steun, wat aandui dat hulle sosiaal verbind voel.

Suid-Afrika beklee die 19de plek op die lys vir inkomstesekuriteit en 83ste vir ’n bevorderlike omgewing, maar die indeks wys die persoonlike veiligheid van bejaardes bly ’n bron van kommer.

Die Afrikalande wat die beste vaar, is Mauritius, wat die 38ste plek beklee, gevolg deur Suid-Afrika, Ghana (81ste plek) en Marokko (83ste plek).

Die meeste Afrikalande beklee ’n lae plek op die lys. Hierdie lande se bevolking is oorwegend jonk en ouderdomsvraagstukke kry nie dikwels voorkeur op die agenda van binnelandse beleid nie.

Daar is min Afrikalande op die lys, want hulle het ’n gebrek aan internasionaal vergelykbare data oor ouer mense.

- Sapa