Dawid van Vuuren se seuns, Daniel en Marius, is onterf; alles is aan Dawid se twee dogters bemaak. Marius sê voor sy pa se dood het Daniel vir hom gesê hul pa het ’n testament opgestel waarin hy sy dogters as sy enigste begunstigdes verklaar in ’n poging om Daniel te laat ophou rook. Volgens die publikasie het Marius die handgeskrewe testament wat ná sy pa se dood gevind is in die hooggeregshof in Pretoria teengestaan. Hy het gesê hy beskou die papier bloot as ’n dreigement vir Daniel.

Daniel het aangevoer hy het eers ná sy pa se dood van die “testament” bewus geword, het die dagblad berig. “Die waarheid is, my pa het my op vele geleenthede gemaan hy sal my onterf as ek nie ophou rook nie. Ek het sy dreigement nooit ernstig opgeneem nie,” het Daniel luidens berigte gesê.

Regter Cynthia Pretorius het gesê geen ander testament kon gevind word buiten die handgeskrewe een nie. Sy het die meester van die hof opdrag gegee om die handgeskrewe dokument as die ware testament te aanvaar.