Gebruik tegnologie

Daar is ’n verskeidenheid apps wat ’n mens help met die aanleer van wêreldtale. Probeer byvoorbeeld die DuoLingo-app (vir iPhone en Android-toestelle). Dié gratis app bied kursusse in Spaans, Frans, Italiaans, Duits en Portugees aan. Dit kan ’n lekker manier wees om die woordeskat wat in die klas geleer word, vas te lê en uit te brei.

DuoLingo laat die aanleer van die taal soos ’n speletjie voel en jy kry punte vir elke vlak wat jy voltooi. Jy kan luister na die uitspraak van woorde en dit moedig jou ook aan om die woorde wat jy leer binne konteks te gebruik. Gaan loer hier: duolingo.com/

As jy nie ’n slimfoon het nie

... is daar verskeie webtuistes wat jy op ’n rekenaar kan besoek. Kyk byvoorbeeld na die BBC se gratis webtuiste vir die aanleer van Frans: bbc.co.uk/languages/french/

Belê in ’n goeie tweetalige woordeboek

Daar is woordeboeke wat spesifiek bedoel is vir die aanleer van ’n nuwe taal. Probeer byvoorbeeld Oxford se Learner’s Dictionary-reeks. Dit gee duidelike vertaalekwivalente, help met sinskonstruksie en sluit dikwels ook ’n afdeling in met frases wat jy elke dag gebruik. So ’n woordeboek kan uiters waardevol wees vir huiswerk of mondeling.

Vir die ernstige Franse leerder

As jou kind besonder ernstig en gemotiveerd is oor die aanleer van Frans en jy bereid is om geld daaraan te bestee, is die Alliance Française (learnfrench.alliance.org.za) ’n uitstekende hulpbron. Dié internasionale organisasie het take in onder meer Kaapstad, Johannesburg, Port Elizabeth, Somerset-Wes en Potchefstroom, en bied ’n verskeidenheid professionele kursusse van uiteenlopende vlakke aan.

By die huis

Die boustene van ’n nuwe taal is woordeskat. Om die sinskonstruksie te verstaan is noodsaaklik, maar dit is eers wanneer jou kind ’n noemenswaardige woordeskat het wat dit vir hulle gaan voel asof hulle die taal kan praat. Laat hulle toe om notas op voorwerpe in die huis te plak om die name daarvan in die nuwe taal aan te leer. Of help met die maak van flitskaarte waarmee woordeskat vir ’n toets vasgelê kan word.

Betrek die res van die gesin by die aanleer van nuwe woorde sodat jou kind nie geïsoleer voel nie en kan sien die taal is vir ander ook vreemd en nuut! Hoor by jou kind se onderwyser hoe jy verder betrokke kan raak.

Wees optimisties

Dit is belangrik dat jy jou kind motiveer wanneer hulle mismoedig voel oor die nuwe taal. Herinner hulle gereeld aan die voordele wat ’n nuwe taal inhou. Dit is dalk ’n goeie idee om hulle aan te moedig om minder te fokus op toetspunte en eerder te fokus op al die nuwe woorde en sinne wat hulle al geleer het – ’n goeie punt beteken nie noodwendig jy kan die taal praat nie! Doen saam navorsing oor moontlike uitruilgeleenthede na byvoorbeeld Duitsland of Spanje wanneer hulle ouer is sodat daar nou al ’n mikpunt is om na uit te sien.

- Suzaan Hauman