Soet en stroperig en net reg om met jou hande te eet tot jou gesig blink van die lekkerte – jou kinders gaan mal wees oor hierdie ribbetjies.

Genoeg vir 4 mense

Bereiding: 15 minute

Staantyd: oornag of 2 uur

Gaarmaaktyd: 1-2 uur

Jy benodig:

  • 1,5 kg beesribbetjies, in stukke gesny
  • sout en peper
  • 70 ml tamatiesous
  • 50 ml blatjang
  • 45 ml (3 e) sagte bruinsuiker
  • 30 ml (2 e) worcestersous
  • 1 groot suurlemoen se sap (sowat 60 ml) en skil
  • pietersielie, gekap

Maak só:

  1. Verhit die oond tot 160 °C en smeer ’n groot oondbak met olie.
  2. Geur die rib met sout en peper en rangskik in ’n glasbak.
  3. Meng die res van die bestanddele buiten die pietersielie en giet dit oor die ribbetjies. Maak seker die marinade bedek al die kante.
  4. Marineer oornag of minstens een uur. Pak die ribbetjies in die voorbereide oondbak en bak sowat ’n uur of tot gaar en tot die sous taai en klewerig is.
  5. Verf die ribbetjies met die marinade terwyl dit in die oond bak.
  6. Garneer met die vars pietersielie.
  7. Sit die ribbetjies voor met kapokaartappels en geroosterde tamaties.

Wakker wenke:

Maak die ribbetjies so op die ketelbraai gaar: Smeer die rooster liggies met olie. Plaas die ribbetjies so op die rooster dat daar geen kole direk onder die ribbetjies is nie en sit die deksel van die Weber op. Verf die ribbetjie gereeld met die marinade en draai dit gereeld om.

Maak Oosterse ribbetjies: Vervang die marinade hierbo met ’n marinade wat bestaan uit 30 ml oestersous, 180 ml sojasous, 125 ml sjerrie, 3 huisies fyn knoffel, 1 stukkie vars gemmer, 2 salotte en 180 ml suiker. Marineer 1-2 uur in die yskas en braai op die kole.