Prinse William (30) en Harry (28) van Brittanje het Saterdagaand 1 Junie op ’n ramparty skemerkelkies gedrink, met opblaasspeelgoed gespeel en op die maat van Harlem Shake gedans. 

Die koninklike broers het dit “gate uit geniet” in Harry se pel Guy Pelly se klub Tonteria in Sloane Square, Sentraal-Londen. En William – wie se vrou, Kate, hul eerste kind verwag – het die geleentheid aangegryp om ’n bietjie te ontspan voor die slapelose nagte aanbreek.

’n Vriend het aan die koerant The Sun gesê: “William het alles uitgehaal. Hy het baie gedans en saam met die musiek gesing.

“In ’n stadium het hy selfs op die maat van die musiek teen die lae plafon gekap. Dit het gelyk of hulle dit gate uit geniet.”

Terwyl hulle op maat van die internetsensasie Harlem Shake gedans het, het William skitterstokkies in die BBP-area van die eksklusiewe klub rondgeswaai.

Die broers het aan skemerkelkies geteug terwyl hulle partytjie gehou en met opblaasspeelgoed pret gemaak het voor hulle om halftwee die oggend by die klub weg is. William het effe aangeklam gelyk toe hy by die agterdeur uitgeglip het.

Harry word eintlik as die partytjiedier beskou nadat naakfoto’s van hom verlede jaar uitgelek het. Die foto’s is geneem toe hy in Las Vegas tussen ’n groep beeldskone meisies ontklee-biljart gespeel het.