Dis nou al 20 dae sedert die linkervoet van Elnye Potgieter (5), wat aan die seldsame Ollierbeensiekte ly, in die Life Groenkloof-hospitaal geamputeer is.

voetagt
Weens die siekte was haar linkerbeen – die “bababeentjie”, soos sy dit noem – reeds sowat 9 cm korter as haar regterbeen. Dié verskil sal groter word namate sy ouer word.

Weens die erge graad van haar toestand was amputasie eindelik die enigste uitweg om die meisie ’n kans op ’n meer normale lewe te bied.

Haar ma, Elmarie (34), ’n administratiewe beampte, het Maandag aan Huisgenoot vertel die herstelproses is maar moeilik en klein Elnye aanvaar dit nog swaar dat haar voetjie afgesit moes word.

voetdrie
“Ons is besig om haar van die pynmedikasie te speen en dit gaan ’n bietjie rof. Sy sê ook kort-kort vir my sy mis haar babavoetjie en dan moet ek haar maar troos en probeer verduidelik,” vertel sy.

Die operasie was darem ’n sukses en haar dokter sal waarskynlik op of kort ná 10 Maart die steke kan verwyder.

“Sodra die wond gesond is, wat hopelik in die week van 13 Maart sal wees, gaan sy vir die gieting van die prostese. So ons glo teen einde Maart, begin April behoort sy haar prostese te hê.

“Sy kla ook maar baie sy word moeg om op die een been te hop en dan oor die spiere wat saamtrek,” vertel Elmarie oor wat haar kind nou deurmaak. Maar hulle hou moed.

“Ons is baie nuuskierig om te sien hoe dit gaan lyk wanneer die pleisters verwyder word. Tyd is maar net die dodelikste ding, want dit put ’n mens nogal uit om haar heeltyd kalm te hou en te verduidelik.”

voetvier
Huisgenoot het begin vanjaar oor dié dapper meisie berig wat op haar jong ouderdom moes vrede maak met die onafwendbare dat sy haar voet sou moes verloor om meer normaal te leef (Tot siens vir my ‘bababeentjie’, Huisgenoot, 5 Januarie 2017).

“My voetjie gaan in ’n pers kissie na Jesus toe,” het die bekkige meisie nog vertel. Dit kom nadat haar ma aan haar moes verduidelik wat gaan gebeur. Al wat sy wou weet, is wat van haar voet gaan word.

Elmarie en haar man, Eddie (38), wat sy eie aluminiumonderneming bedryf, het met Huisgenoot se onderhoud ook vertel van die enorme mediese onkoste wat nie gedek word nie.

Een hiervan is die prostese wat Elnye gaan moet kry en wat, namate sy groei, aangepas en vervang sal moet word. Hul mediese fonds het boonop net R11 000 van die operasie gedek. Hulle het op 23 Februarie ’n gholfdag in Pretoria gereël om geld vir Elnye in te samel.

voettien
Enigiemand wat die gesin graag wil help of bystaan, kan die webtuiste Childmedi.org vir nog inligting besoek of Eddie by eddie@aliwin.co.za kontak.

Wat is Olliersiekte?

Olliersiekte, ook bekend as meervoudige enchondromatose, kom by sowat een uit 100 000 mense voor.

Dr. Juan Marin, ’n ortopediese chirurg van Johannesburg, sê enchondrome is niekwaadaardige, kraakbeenagtige gewasse wat naby die groeiplate van die been vorm. “’n Kind het kraakbeen wat (harde) been word soos die kind groei. Die groeiplate bestaan uit kraakbeen. Wanneer dit nie hard word nie, vorm dit enchondrome.”

Die siekte word gewoonlik by jong kinders gediagnoseer en is nie oorerflik nie. Dit word gekenmerk deur enchondrome in die beenskag en metafise van verskeie bene. Dit is geneig om in een ledemaat voor te kom. Die aangetaste ledemaat is gewoonlik korter. Komplikasies sluit in misvorming, herhaalde beenbreuke en swakker spiere.

Dit is ook moontlik dat enchondrome mettertyd kwaadaardig kan word. As dit ná puberteit begin vergroot, word kwaadaardigheid gewoonlik vermoed – veral as daar pyn en herhaalde frakture is. Dan moet die ledemaat geamputeer word.