Is jou opsoek na ‘n vinnige, maklike manier om jou kleinspan lekker besig te hou? Rou pasta kan gebruik word vir allerlei kunsprojekte. Ons vertel jou hoe.

Pastakleursel

Meng ½ koppie alkohol (wat by apteke te kry is, vra vir “rubbing alcohol”) met voedselkleursel in ’n bakkie. Voeg klein hoeveelhede droë pasta by die mengsel en meng versigtig. Hoe groter die pasta, hoe langer voor dit die kleur absorbeer. Laat droog word op waspapier wat bo-op koerantpapier gelê is. Jy kan die alkohol en kleursel ook in ’n Ziploc-sakkie gooi, dit ’n bietjie skud en die pasta binne-in laat lê tot dit mooi gekleur is.

WENK: Jy kan die alkohol met alkoholbevattende handontsmetmiddel vervang.

Pastakroon

Versier ’n haarband bo-op met helder gekleurde stukkies droë wawiel-pasta (rotelle) sodat dit soos ’n tiara lyk.

Pasta-halssnoer

Ryg ’n halssnoer van penne of rigatoni van verskillende kleure deur ’n toutjie deur die buise te steek en dit vas te maak. Maak dit estra stylvol deur ’n strikdaspasta- (farfalle-)hangertjie aan die onderste punt vas te knoop.

Pastaportret

Laat jou kind enige prent wat hy geteken het met pasta versier of definisie gee. Gebruik ronde stukkies pasta vir oë wees, spiraalpasta (fussili), spaghetti of 2-minuutnoedels vir hare en ’n strikdassie (farfalle) onder die ken vir finale afronding.

Groetekaartjies

Versier kaartjies of plakkate met oulike gekleurde pastavorms.

Potloodbeker

Sny die boonste deel van ’n klein sapboksie los sodat dit oop is. Gom pastavorms in mooi patrone aan die kante vas en spuitverf die hele spulletjie een kleur, soos pienk of blou. Gebruik dit as ’n potloodhouer.

Bron: Huisgenoot-Speel