Die nuus oor Jacob Zuma se 20ste kind het Suid-Afrika soos ’n stormsee getref, met elke dag ’n nuwe brander wat oor ’n verstomde nasie breek. So kort ná ons president se poligame troue was dit voorbladnuus van Londen tot in Lusaka – en hier in Suid-Afrika het die tonge onophoudelik geklap.

Sy politieke teenstanders meen hy is promisku en onverantwoordelik; hy is ’n seksslaaf wat soos Tiger Woods vir rehabilitasie moet gaan; ’n gigolo wat vroue moet los en op leierskap begin fokus, en ai, al weer onbeskermde seks buite die huwelik...

Dae later het hy teruggekap en gesê hy het gedoen wat sy kultuur in sulke omstandighede vereis – vaderskap aanvaar en vergoeding betaal – en die saak is nou “tussen ons, en kultureel tussen die Zuma- en Khoza-familie”.

Intussen het Sonono Khoza (39), dogter van Zuma se ou vriend die sokkerbaas Irvin ‘‘Iron Duke’’ Khoza, ontken dat sy ’n baba by die president gehad het. ‘‘Baba? Watter baba?’’ het sy gevra. Maar die baba is daar: Thandekile Matina Zuma is vier maande gelede gebore.

‘‘Die verhouding tussen Zuma en Sonono kon nooit vir altyd geheim gehou word nie,’’ sê ’n bron. Die tonge het in Diepkloof Extension geklap toe die president se kavalkade op 17 Januarie voor die Khoza-weeldehuis stilhou. Sy familie het inhlawulo gaan betaal (skadevergoeding vir die dogtertjie wat buite die eg gebore is). Irvin was nie daar nie. Hy voel glo verraai deur Zuma se verhouding met sy dogter.

Lees die volledige artikel in Huisgenoot van 11 Februarie