Sy lyk weer gelukkig. “Rond en gesond,” sê die fyn, blonde sangeres vrolik. Jy soek verniet die betraande Patricia Lewis wat verlede Mei in Huisgenoot vertel het daar is ses gewasse aan haar skildklier – een bitter na aan haar stembande – en die moontlikheid van kanker is nog nie uitgesluit nie. Die dokters sou moontlik moes sny en dalk sou sy nooit weer gesing het nie...

Nou lyk die toekoms aansienlik rooskleuriger. Die gewasse was toe nie kwaadaardig nie, en sy het genoeg moed gehad om chirurgie te weier en liewer die natuurlike roete te volg met osoonterapie, homeopatie en vitamienaanvullings.

Al is die gewasse nie heeltemal weg nie en moet sy binnekort weer vir ’n sonar gaan, is die knop aan haar keel nou heelwat kleiner. “En ek kan nog sing!” jubel Patricia “My stem word nou gouer moeg en ek kan voel iets druk op my stembande, maar ek gaan nog in elke Supersterre-episode sing.’’

Alles is nou weer op stryk nadat haar televisie-baba ook baie amper vir altyd stil was. In 2007 is die tweede seisoen van haar gewilde talentsoekreeks, Supersterre, op SABC2 uitgesaai, maar net daarna het die SAUK finansiële probleme ondervind en kon Patricia dus nie toe ’n derde seisoen opneem nie.

Sy en die SAUK het intussen hul probleme uitgestryk, en nou is Patricia druk besig met opnames vir die derde seisoen.

Patricia, manlief Mark Whitfield en hul seun, Max, is in Johannesburg vir die opnames van Supersterre, maar eintlik woon die gesin meestal in die luukse Zimbali-kusoord buite Ballito aan die KwaZulu-Natalse kus nadat misdaad hulle uit Johannesburg verdryf het.

Sy gaan voortaan net sporadies optree en haar aanhangers moet maar geduldig wees as hulle dalk wonder oor ’n nuwe album. Dit gaan dalk ook die laaste Supersterre-seisoen wees waarin sy self die aanbieder is.

Sy is in haar skik met Casper de Vries wat as nuwe beoordelaar by hulle aangesluit het.

Supersterre word elke Sondag van 14 Februarie tot 28 Maart om 12:00 by Carnival City in Brakpan opgeneem

Lees die volledige artikel in Huisgenoot van 18 Februarie.