Die suiwelhandelsmerk Parmalat het ’n besending PureJoy-appelsap aan die mark onttrek, want dit is met skoonmaak-chemikalieë besmet, het The Star vandag berig.

“Al die onverkoopte produkte wat geraak is, is reeds uit ons verspreidingstelsel onttrek, asook waar moontlik van die winkels waarheen dit versprei is,” is die Parmalat-woordvoerder Andre Mahoney aangehaal.

“Ons rekords toon die verspreiding vir primêre verkope was heel waarskynlik tot die Wes-Kaap beperk, maar ons erken dat verbruiker of verspreiders die produk na ander gebiede kon geneem het.”

Die geraakte besending is die 200 ml UHT PureJoy-appelsap met strooie daaraan vas.

Andre sê ’n aanvanklike ondersoek dui op ’n fabrieksprobleem wat gelei het tot die versending van “ ’n klein aantal pakke” wat met die skoonmaak-chemikalieë besmet is.

Die onderneming sê die sap is nie vir inname geskik nie en die besmetting raak geen ander produkte nie.

Die ondersoek duur voort.

- Sapa