Lt.kol. Johannes Vermeulen het vanoggend begin getuig oor die deur sowel as die krieketkolf wat Oscar gebruik het. Daar was ’n struktuur in die hof waarin die deur vasgemaak is. Die struktuur se agterkant is ’n voorstelling van die toiletvertrek waarbinne Reeva was.

Daar was twee merke op die deur wat Oscar se aandag getrek het. Dit is die merke waar hy die deur met die krieketkolf getref het toe hy dit probeer oopbreek het. Vir die een merk moes die persoon aan die linkerkant gestaan en van die kant af geslaan het, en met die tweede merk het die persoon die deur van voor af geslaan.

Johannes het die slaan-aksie ’n paar keer gedemonstreer.

Wanneer hy regop gestaan het, het hy bo die merk geslaan. Wanneer hy gebuk het, het hy die merk getref.

Vermeulen het getuig dat Oscar nie sy prostese aangehad het toe hy die deur met die krieketkolf geslaan het nie. In sy verklaring tydens sy borgaansoek het hy gesê hy het sy prostese gaan aantrek voor hy die deur met die kolf oopgeslaan het.

Tydens die teepouse het Oscar se regspan die deur uit verskillende hoeke met die kolf geslaan. Barry Roux het gewys jy kan die merk tref as jy net effe verder van die deur af staan.

- Hilda Fourie