[caption id="attachment_133730" align="alignnone" width="601"]Caylum by sy pa, Wayne. Foto: Verskaf Caylum by sy pa, Wayne. Foto: Verskaf[/caption]

Caylum Willemse, sewe maande oud, is gebore met trageo-esofageale fistula, ’n abnormale verbinding tussen die slukderm en lugpyp. Hy ly ook aan esofageale atresie, ’n aangebore defek wat voor geboorte plaasvind. In die meeste gevalle eindig die boonste deel van die slukderm en verbind nie met die laer slukderm en maag nie.

Om Caylum se lewe te red is ’n ingewikkelde operasie deur ’n Amerikaanse dokter nodig. Die prosedure kan nie in Suid-Afrika uitgevoer word nie. ’n Spesialis, dr. Russell Jennings, het baanbrekerswerk oor die lewensreddende prosedure gedoen. Caylum se enigste hoop is dus op die operasie in Boston.

Lees ook: Baba veg om sy lewe nadat daar in trurat oor hom gery is

Trageobrongomalasie is ’n ruk ná die seuntjie se geboorte op 12 Januarie vanjaar by hom gediagnoseer. Dit is ’n seldsame toestand waar die lugpyp se kraakbeen sag is, en beteken hy is nie ’n kandidaat vir ’n trageostomie nie.

Die dapper seuntjie het op twee dae sy eerste operasie ondergaan. In ’n aortopexy is die aortaboog chirurgies aan die sternum verbind. Dit lei daartoe dat die trageale holte oopgetrek word. Dit word gebruik vir die behandeling van ernstige trageomalasie of trageale.

[caption id="attachment_133749" align="alignnone" width="600"]Caylum by sy ouers, Samantha en Wayne, en sy sussie, Charlotte (9). Foto: Verskaf Caylum by sy ouers, Samantha en Wayne, en sy sussie, Charlotte (9). Foto: Verskaf[/caption]

Caylum hou met rukke op asemhaal. In sy kort lewe is hy al meer as 10 keer bygebring. Hy is al sedert 20 Maart in die hospitaal en sedert 9 Mei in die waakeenheid.

Sy ma, Samantha, sê Caylum het twee weke gelede twee virusse onder lede gehad. “Hy was so siek dat hulle hom onder verdowing moes hou.

“Omdat hy reeds trageo-esofageale fistula het, val enige virus hom aan. Die een virus wat hy opgedoen het, veroorsaak ’n swelling in die lugpyp en dan sukkel hy om asem te haal. Twee weke gelede het hy ophou asemhaal.”

Sedert sy geboorte was Caylum nog net sowat drie weke tuis.

Samantha sê dit gaan nou baie beter met hom, maar virusse kan dodelik wees.

Die enigste behandeling in Suid-Afrika is ’n behandelingsplan waarmee lug met ’n lugsak in sy longe ingedwing word deur ’n toestel oor sy mond en neus te plaas. “Ons het dit vir ’n halfuur probeer, maar hy het so hard baklei dat sy tellings gedaal het. Dit was te veel vir hom,” sê sy.

Lees ook: Kyk die ongelooflike oomblik toe dokter ’n baba in die stuitposisie omdraai

Die enigste ander opsie (buiten die operasie in Boston) is ’n trageostomie. “As hy dit kry, kan hy nie lag, huil of praat nie en ek kan dit nie aan my kind doen nie.”

Die Caylum Willemse Stigting, ’n organisasie sonder winsbejag, is op die been gebring om geld in te samel om Caylum in Boston te kry vir die operasie. Adriaan Gerber, verteenwoordiger van die organisasie, sê altesaam $500 000 (sowat R6,8 miljoen) is nodig vir die onkoste Amerika toe en die operasie.

“Duisende mense is aktief betrokke om Caylum se storie te versprei. Ons is dag en nag besig met geldinsamelings en ontvang honderde e-posse, Facebook-boodskappe, twiets en WhatsApp-boodskappe van mense regoor die land wat wil help,” sê hy.

’n Pretloop word op Sondag 4 September in Johannesburg gehou en nog een word tans deur ’n vrywilliger in die Paarl, Kaapstad gereël.

Vir nog besonderhede, besoek The Caylum Willemse Foundation Facebook-blad.