In Suid-Afrika het die klein seuntjie se organe die een ná die ander begin ingee weens die TVGS. Die beste behandeling wat sy ouers vir hom kon kry, was in Los Angeles, Amerika. Lydia en Ryan is vandag nog saam met hul seuntjie en sy sussie, Payton, in die vreemde. Dit gaan maar broekskeur.

Reef se ouma Charmeon Carneson vertel die gesin kon weens die oop hand van mense en aanlyn geldinsamelingsveldtogte na Amerika verhuis nadat hulle al hul besittings verkoop het. Nou nog leef hulle van skenkings en letterlik van die hand in die tand.

“Hulle is nou twee jaar in Amerika en dit gaan baie goed met Reefie,” vertel Charmeon. “Die gesin voer ’n stryd om in die land te bly. Ryan kon nie werk kry nie omdat hulle daar is met ’n mediese visum.” Ryan het sowat ’n jaar gelede begin studeer as ’n jef wat in fyngebak spesialiseer en so kon hulle langer in die land aanbly op Ryan se studievisum.

“Dit lyk maar of hulle ’n somber Kersfees gaan hê,” vertel Charmeon. “Ryan kon amper nie op 13 Desember gradueer nie omdat nog R40 000 van sy studiegeld uitstaande was. Maar die mense op Reefie se Facebook-blad en sy familie het weer hul hart oopgemaak en die geld ingesamel.”

Dis ’n troos, maar die gesin sukkel steeds met daaglikse lewensuitgawes en mediese koste wat gedek moet word, sê Charmeon. Reef moet binnekort ’n gehoorstuk van sowat R20 000 kry. Vroeër vanjaar het Lydia aan Huisgenoot vertel hoe sy al flou geval het weens hongerte en Ryan soms op ’n koppie koffie per dag oorleef (Vol Hoop Ins Ons Nood, 13 Junie 2013).

Charmeon en haar man, Don, gaan kuier oor twee weke vir die gesin om ondersteuning te bied, want hulle is uiters gespanne en bid getrou dat daar genoeg geld ingesamel sal word tot Ryan kan begin werk en sodat hulle hul huur, kos, mediese en maandelikse uitgawes kan dek. “Maar ek weet as hulle alles oor moes doen, sou hulle dit presies weer so doen. Elke keer wanneer ’n mens die stadige maar goeie vordering van hulle wonderwerk baba sien, besef hulle dit net weer.”

Daar is darem lig aan die einde van die tonnel vir die gesin, vertel Charmeon. “Ryan se studievisum laat hom toe om ’n jaar nadat hy gegradueer het, in Amerika te bly en te werk. Hy soek nou naarstiglik werk en hopelik sal die inkomste wat hy verdien finansiële verligting bring met al die uitgawes wat hulle het.”

IMG_0451.JPGmag14

Intussen reageer Reef goed op die behandeling en sowat 15 soorte chroniese medisyne wat hy daagliks drink. Die seuntjie se liggaam wil steeds die beenmurg verwerp; daarom word hy met steroïede behandel.

In Los Angeles bly Reef en Payton heeldag in volslae afsondering in die gesin se woonstel omdat sy immuunstelsel so swak is. Die geringste kontak met ander kinders kan ’n dodelike besmetting veroorsaak; daarom kan Payton ook nie in kontak met ander kinders kom nie.

mag9

“Dit lyk asof hy einde vanjaar van die steroïede gespeen kan word, wat hom in staat kan stel om sy eie immuunstelsel op te bou en wat dit veiliger vir hom sal maak om na Suid-Afrika te reis.”

Charmeon sê as dit nie vir die groothartigheid van die publiek was nie, sou Reefie lankal gesterf het. “Ons dank die Here elke dag vir die wonderwerk wat Reef is.”

Danél Blaauw

Mense wat ’n bydrae tot die Carnesons se uitgawes wil lewer, kan ’n e-pos aan Charmeon stuur by charmeonc@gmail.com of SMS REEF na 38771 om R10 te skenk.