Ons het ’n lysie chirurgiese prosedures saamgestel wat jy nooit gedink het moontlik is nie.

1.    Skep ’n sespak

Hoekom ure op die vloer swoeg met opstote en opsitte, as ’n plastiese chirurg vir jou die maagspiere kan skep? Jy kan deesdae die hoëdefinisie-liposkulptuur-prosedure laat doen. Dit behels lipo-uitsuiging en velvermindering. Geskikte kandidate het oortollige vel van gewigsverlies. Die prosedure gaan nie oor gewigsverlies nie, maar om jou liggaam te vorm. http://www.liposculptureauthority.com/hi-def-liposculpture-for-men/

2.    Verandering van die handpalmlyne

Watter beter manier om jou noodlot te verander as om jou handpalmlyne te verander, en dan ’n handpalmleser dit te laat lees?  Jy kan vyf tot 10 lyne verander met hierdie prosedure, waarin ’n elektriese skalpel gebruik word om die vel te brand.  Handpalmverandering is baie gewild in Japan. Die prosedure duur 10 tot 15 minute en kos sowat R10 000. Die rede hiervoor? Om jou noodlot te verander, natuurlik. http://www.businessinsider.com/palm-plastic-surgery-is-popular-in-japan-2013-7

3.    Maak ’n kuiltjie

Kuiltjies is alte oulik. Nou kan jy tog te dierbaar lyk met ’n prosedure wat kuiltjies maak. ’n Snytjie word aan die binnekant van jou wang gemaak. Absorbeerbare garing word deur die binnekant van die wang gedruk en vang die binnekant van die vel waar jy die kuiltjie wil hê. Wanneer die garing gebind word, skep dit die permanente kuiltjie buite op die vel. Dit duur sowat 20 minute en is glo pynloos.  http://www.draharonov.com/dimple.html

4.    Langer ledemate

Daar is eindelik hoop vir jou as jou lengte tussen jou en jou drome om ’n supermodel te word gestaan het. Ons het gedink ledemateverlenging was ’n grappie in die fliek White Chicks. Maar dit is waar en moontlik. Dié prosedure word meestal uitgevoer op pasiënte wat as dwerge gediagnoseer is, of ’n gebrek het. Daar is verskillende verlengingsmetodes. Een is om apparate in te plant wat die ledemaat van binne af verleng. Die metode is beperk tot ouer kinders en volwassenes. http://www.limblengtheningdoc.org/limb_lengthening_intro.html

5.    Snorinplanting

Ons simpatiseer met almal wat nie kon deelneem aan die Movember-uitdaging om ’n welige snor te groei nie. Nie almal kan perfek wees nie, of hoe?  As jy sukkel om ’n snor te kweek, kan jy altyd ’n snorinplanting probeer. Volgens die Daily Mail is hierdie prosedure veral gewild onder Arabiese manne. Dit kan tot R70 000 kos, en behels dat ’n strook hare van die agterkant van die kop oorgeplant word.  Een of twee hare word met een slag op die bolip ingeplant. http://www.hairtransplantsurgery.co.uk/beard-moustache-hair-transplant.html

Bronne: daily mail; afkinsider.com; nbcnews.com; cbsnews.com