Dit was veronderstel om die begin van ’n nuwe, goue era van hoop te wees, die historiese dag toe Barack Obama op 20 Januarie 2009 die eerste swart president van Amerika geword het.

Met sy slagspreuk “Yes, we can” het hy reuse verwagtinge opgetower by die byna 70 miljoen mense wat vir hom gestem het.

Maar vandag, ’n jaar later, het allerlei harde werklikhede hom ingehaal, en die euforie van die eerste dae is besig om soos mis voor die son te verdwyn.

Trouens, buiten Gerald Ford, het Obama se gewildheid in sy eerste jaar vinniger getuimel as enige Amerikaanse president s’n die afgelope 65 jaar. Teenoor 78 persent begin verlede jaar huiwer dit nou net bo 50 persent.

Sy hantering van Amerika se ekonomiese probleme en van ie oorlog in Irak en Afganistan het skerp kritiek ontlok, en toe hy in Desember die Nobelprys vir Vrede kry, het bitsige stemme opgegaan.

“Wat het hy nou al eintlik bereik?” moes selfs Obama-goedgesindes heimlik wonder. En hy moes self in sy Nobel-toespraak erken: “Selfs dié van ons met die beste bedoelings sal soms nie daarin slaag om die onregte voor ons reg te stel nie.”

Om sout in die wonde te vryf het die opposisie, die Republikeine, die afgelope tyd oortuigende oorwinnings in drie belangrike tussenverkiesings behaal.

Lees meer in die 4 Februarie-uitgawe.

Hoe dink jy vaar Barack Obama?