Brad Pitt en Angelina Jolie het hul huis in New Orleans vir R66 miljoen verkoop.

Angelina het die wêreld in September geskok toe sy om ’n egskeiding aansoek doen en onversoenbare verskille as die rede aanvoer. Die paartjie, wat ses kinders het, is sedert 2005 saam en is in 2014 getroud.

Die voormalige paartjie het nou hul luukse drieverdiepinghuis in die Franse kwartier van die stad in Louisiana verkoop, volgens eiendomsrekords in die stad.

Die eiendomsagent Nina Killeen het die verkoop van die vyfslaapkamerhuis uit die 1830’s Vrydag bevestig. “Dit het vir ’n baie goeie prys verkoop. Dis ’n goeie ooreenkoms vir albei partye. Hulle is gelukkig met die uitkoms.”

Brad en Angelina het die huis in 2007 vir sowat R47 miljoen gekoop nadat die akteur die Make It Right-stigting op die been gebring het om die ontwikkeling van nuwe behuising in die stad se Lower Ninth Ward-buurt ’n hupstoot te gee ná die verwoestende orkaan Katrina in 2005.

En dit lyk of die huis in New Orleans nie al een is wat te koop is nie. Die paartjie het glo ooreengekom om Chateau Miraval, hul landgoed in die suide van Frankryk, ook op die mark te sit, berig US Weekly.

Hulle het die eiendom van 1200 akker, wat ’n wingerd insluit, in 2012 vir R810 miljoen gekoop.

Die twee besit ook ’n kasarm in die Los Feliz-buurt in Los Angeles en het ’n woonstel in die Waldorf Astoria Towers in New York.

© Cover Media