Dié musieklegende se skoonsuster en voormalige bestuurder, Pat Houston, het ’n beskermingsbevel teen Whitney se skoonseun, Nick Gordon, gekry omdat sy vrees vir haar lewe nadat hy haar glo gedreig het en onder meer foto’s van vuurwapens getwiet het.

Whitney het Nick (24) grootgemaak en hy was soos ’n broer vir haar enigste kind, Bobbi Kristina Brown (21). Pat en Whitney se ma, Cissy Houston, was glad nie ingenome toe dié twee besluit om te trou nie.

Nick was vroeër vandeesmaand op Pat se dogter, Rayah, se 16de verjaardagpartytjie betrokke in ’n bakleiery met Whitney se neef Gary Houston omdat hy glo onder meer die Houston-familie slegsê.

Nick is blykbaar gedurig verwaand omdat hy dink hy het “gewen” nadat Bobbi Kristina haar familie se raad geïgnoreer en met hom getrou het, vertel ’n familievriend. “En nou geniet hy die geld wat Whitney vir Krissi nagelaat het toe sy in 2012 oorlede is.”

Nick het boonop Pat en Gary op Twitter gedreig en sleggesê, en het foto’s van masjiengewere en gewere getwiet.

Volgens die beskermingsbevel moet hy 180 m wegbly van Pat af.

En wat dink Nick daarvan? Wel, hy “gee nie ’n *** om” oor die beskermingsbevel nie, het hy aan die skinderwebtuiste TMZ gesê.

Sjoe! Whitney draai seker in haar graf om.

BRONNE: TMZ.COM, THEYBF.COM, BOSSIP.COM