Navorsers aan die Universiteitskollege van Londen het bevind wanneer iemand oor hul gewig gekritiseer word, sal dit ’n reeds onsekere mens meer laat eet en oefening omdat hulle bang is hulle word gespot.

Navorsers het sowat 3 000 Engelse vroue en mans bo 50 bestudeer. Deelnemers is geweeg en uitgevra oor die teenstand wat hulle kry weens hul gewig, soos om met minagting behandel te word, swak diens in byvoorbeeld restaurante en aanmerkings oor hul gebrek aan intelligensie.

Een uit 20 het erken hulle is anders behandel weens hul voorkoms, maar in die geval van die mees oorgewig deelnemers, wat dis meer as een uit drie.

Die studie, waarvan die bevindinge in die vaktydskrif Obesity gepubliseer is, het gemeld mense was geneig om vir die duur van die studie sowat 1 kg aan te sit as hulle oor hul gewig gekritiseer is, en dié wat oorgewig was, was ses keer so geneig om vetsugtig te raak.

Sarah Jackson, wat die ondersoek gelei het, glo daar is ’n oplossing. Sy meen die media moenie meer die woord “vet” gebruik nie, en vra mense moet afsien van enige moontlike diskriminasie.

“Ons uitslae toon dat gewigsdiskriminasie nie gewigsverlies aanmoedig nie en dui daarop dat dit selfs gewigstoename aanhelp,” het sy verduidelik.

Dit is belangrik dat ’n mens die probleem erken en werk maak daarvan, sê Kerry Lynn Sparrow, ’n maatskaplike werker van Johannesburg. Hier is haar wenke wat jou oorgewig kind kan help. 1. “Laat die regte persoon die gesprek aanknoop,” sê Kerry Lynn. As die kind besonder naby is aan een van sy ouers, sal dit beter wees as dié ouer met hom of haar gaan praat. 2. Betrek die gesin: ’n Sensitiewe benadering tot jou kind se gewigsprobleem, is om almal in die gesin betrokke te kry. Stel voor dat die gesin saam begin stap en fiks word, en pas die hele gesin se eetgewoontes aan.

3. As jy bekommerd is oor jou kind se gewig, raadpleeg ’n dokter en vind uit of skildklier- of hormoonprobleme byvoorbeeld ’n rol speel.

Volg dié skakels vir gesonde eetplanne vir jou kinders:

© Cover Media; Mieke Vlok