Die mannetjie is skaars ses weke oud, maar Jak de Priester is oortuig daarvan dat hy reeds versot is op musiek. En geen wonder nie, want klein Jamie het met musiek in sy ma se maag gegroei en met musiek in die wêreld gekom.

Tydens haar swangerskap het dié gewilde Afrikaanse sanger se vrou, Michelle, van hul gunsteling-liedjies op haar iPod gelaai en byna daagliks die oorfone teen haar maag gedruk sodat Jamie kon luister.

Michelle en Jak het ook ’n CD gemaak met ’n musiekmengsel van Seal tot Karin Zoid en dit in die teater gespeel toe hul eersteling op 2 Januarie met ’n keisersnee in die wêreld gekom het.

In hul huis in Centurion wys Jak vir ons sy wenresep om ’n baba aan die slaap te sus: musiek, natuurlik. Hy was dadelik versot op sy seun, en nou, met Jamie in sy arms, plant hy die een soen ná die ander op sy gesiggie terwyl hy hom liefdevol bekyk.

Michelle, met wie hy in November 2008 getroud is, sê Jak is ’n baie betrokke pa en verbasend behendig met die doeke se omruil.

Die sanger wat bekendheid verwerf het met sy liedjie Sally Williams Nougat en reeds vyf CD’s agter sy naam het, was verlede Mei vir ’n visvangnaweek by Parys toe Michelle hom met die groot nuus van die swangerskap bel. ‘‘Jou hele wêreld verander skielik. Jy bekommer jou weer oor die misdaad en hoe dit jou kind kan raak. Jy wil die beste ouer moontlik wees,’’ vertel Jak.

Sy aanhangers hoef darem nie bekommerd te wees dat Jak nou net pa gaan speel nie. Hy het vroeg in Februarie ’n koffietafelboek met die titel Brood uitgereik en hy gaan vanjaar landwyd optree om dié versameling gedigte, liedjies, bladmusiek, tientalle foto’s en selfs ’n paar resepte te bemark.

Van sy digbundel, Heuning in die Mond, is al 4 000 eksemplare verkoop sedert dit vyf jaar gelede uitgereik is. Een van die gedigte uit die bundel, Onsekerheid, is in die Nuwe Groot Verseboek gepubliseer.

Lees die volledige artikel in Huisgenoot van 25 Februarie.