Tien jaar het reeds verloop sedert die tragiese dood van die musieklegende Taliep Petersen. Plaaslike kunstenaars, onder wie sy jare lange musiekvennoot, David Kramer, gaan Taliep se lewe nou met ’n huldeblykkonsert vier.

Dit word op Saterdag 29 Oktober in die Grand Arena by die GrandWest-casino in Kaapstad gehou. Dit beloof om ’n makietie soos min te wees, en die kaartjies het soos soetkoek verkoop.

Die sanger en TV-persoonlikheid Emo Adams, wat die konsert vervaardig, is net een van vele plaaslike kunstenaars wat deur die Kaapse musieklegende geïnspireer is. Taliep was bekend vir sy gewilde musiekblyspele, soos Ghoema en Kat and the Kings, wat tot op Broadway in New York gedraai het.

Emo was nog ’n jong knapie toe hy Taliep vir die eerste keer ontmoet. Hier deel hy van sy kosbaarste herinneringe aan die musiekman, wat op sy dag bekend was as Kaapstad se Mr. Entertainment.

Hoe oud was jy toe jy Taliep ontmoet?

Ek was sewe jaar oud toe ek hom en David by die Baxter-teater in Kaapstad ontmoet. My broer, Loukmaan, het ’n oudisie afgelê vir die verhoogproduksie District Six: The Musical. Ek, my pa en Loukmaan het verby al die ander seuns geloop wat ook oudisies vir die rol aflê.

Tot reg voor, waar Taliep by die klavier gesit het. David het langs hom gestaan. Taliep sê toe: “Loukmaan, gooi vir hom ’n paar Nederlandse draaie daar!” Loukmaan het so gemaak en David het die rol op die plek vir hom gegee. Ek onthou ek het nie baie gesê nie, want ek was in verwondering oor die twee celebrities voor my.

Hoekom het julle besluit om nou hulde aan hom te bring?

Ek het vir Ashur (Taliep se enigste seun) by die lughawe raakgeloop, toe vertel hy my sy pa is vanjaar 10 jaar oorlede. Hy het daaraan gedink om ’n klein, intieme huldeblyk te hou, maar toe sê ek: “As jy jou pa gaan eer, moet almal daarin deel. Jou pa was die seun van die Kaap, almal het hom liefgehad en sy musiek geniet.”

Ek het gaan sit en dink, teruggegaan na Ashur en voorgestel ons kry ou cast members wat saam met Taliep gewerk het en vra hulle om by die konsert op te tree.

Hoekom is dit vir jou so belangrik om sy lewe en nalatenskap te vier?

Dis nie regtig ’n viering nie; dis meer ’n huldeblyk en ’n manier om respek te betoon. Ek wou deel wees van geskiedenis en greatness.

Dit was ’n geleentheid om ’n vertoning van dié kaliber te vervaardig en ek wou aan myself wys ek kan ’n stukkie van ons geskiedenis weer mooi maak. Boonop was dit die ideale geleentheid om alles te wys wat ek tot dusver by Taliep, David en my ouers geleer het.

Wat is van jou kosbaarste herinneringe aan Taliep?

Met ons laaste vertoning het ek, Taliep, Alistair Izobell en Nur Abrahams opgetree. Taliep het Klop-Klop gesing en iemand in die gehoor sê toe hy kan dit nie sing nie, want dis Emo se liedjie.

Hy sê toe: “Broertjie, ek het dan die liedjie geskryf. Hoe kan jy sê dis Emo se liedjie?” Toe kom hy na die agterkant van die verhoog en sê: “Van nou af gee ek Klop-Klop vir jou, want blykbaar kan ek nie my eie liedjies sing nie.” Ek kon sien hy bedoel dit, want hy het dit met soveel grasie gesê.

Wat kan aanhangers van die konsert verwag?

Dit is nie veronderstel om ’n emosiebelaaide, hartseer vertoning te wees nie, maar sodra jy na die lirieke luister, begin jy huil. Met elke liedjie besef jy watter ongelooflike man hy was. Ons was baie versigtig met watter David- en Taliep-liedjies ons kies.

Ons het jong en ou kunstenaars gekry wat deur Taliep beïnvloed is; hulle gaan sing. Aanhangers moet net hul ongelooflike herinneringe en sneesdoekies bring.

Wat is jou gunstelingliedjies van hom en en gaan aanhangers dit ook kan hoor?

Queen of Hearts is my gunsteling. Ons speel dit elke Valentynsdag en ek is mal oor die musiekblyspel.

Watter lewenslesse het jy by hom as gesinsman en musikant geleer?

Ek onthou hy het ná 20:00 geen oproepe beantwoord nie, want dan is dit familietyd. Hy sit by sy familie, eet saam met sy familie – dit was daardie soort respek en belangstelling in sy familie wat ek bewonder het.

As dit kom by musikant-wees, kyk ek daarby verby. Met hom en David het dit altyd gegaan oor die passie wat hy op die musiek toepas. Hulle was goeie leermeesters en ikone.

Het jy ’n baie goeie band met sy kinders? Sien jy baie van hom in hulle?

Ek het ’n paadjie met Ashur geloop en hy laat dink my baie aan myself omdat hy groot droom en aktiewe stappe doen om sy drome te bereik. Hy is ’n ongelooflike kitaarspeler, nes sy pa.

Ashur is baie talentvol! Ek het ’n nuutgevonde respek vir hulle almal. Hulle was ’n baie hegte familie; nou selfs meer. Dis ongelooflik om dit te sien. Dit is ’n voorreg om die konsert te vervaardig en ek wil hê mense moet die goeie goed onthou.