Duisende vliegtuie van alle groottes deurkruis die lugruim elke uur van elke dag. En die kans is goed slegte weer kan iewers op ’n vlugroete opduik. En daarmee saam blitse en donderweer wat selfs geharde lugreisigers in koue sweet kan laat uitbars.

Maar hoe bang moet jy werklik wees as jy jou in die middel van so ’n storm bevind?

Volgens die wet van gemiddeldes sal enige lugdiens minstens een keer per jaar deur weerlig getref word.

Die feit dat die meeste vliegtuie se romp uit geleidende aluminium bestaan, kan daartoe bydra dat statiese elektrisiteit ontlaai word wanneer die vliegtuig in stormwolke is. Dus kan die vliegtuig sy eie “weerligstraal” afvuur.

Maar wag, voor jy jou vlug kanselleer is daar ’n skeutjie goeie nuus.

Streng maatreëls vereis dat alle passasiersvliegtuie met ’n elektriese skerm gebou word wat die binnekant van die vliegtuig teen die effek van weerligstrale beskerm. Dié skerm is oor die algemeen so doeltreffend dat passasiers gewoonlik onbewus is daarvan dat weerlig wel hul vliegtuig getref het. Volgens physlink.com is daar twee goed wat jou veilig hou wanneer ’n storm in die lug is: 1. ’n Vlieënier en die weervoorspeller wat saamspan; die weervoorspeller oor waar storms moontlik sal wees, en die vlieënier wat sy kop gebruik om daardie storms so ver moontlik te ontwyk. 2. ’n Klein dingetjie met ’n reuse-taak: die “statiese kern”. Dit word gehuisves in ’n veselglasomhulsel om dit van die vliegtuig self te isoleer. Die skerp punte fokus die elektriese lading rondom dit. So stel dit die vliegtuig in staat om van enige statiese elektrisiteit wat kan opbou, ontslae te raak.

Vlug WW404 van Keflavik, Ysland na Parys Frankryk, is Maandag net ná dit opgestyg het, deur weerlig getref.
Hierdie foto is op 29 Augustus geneem toe die Delta-vlug in Atlanta, Amerika geland het. Niemand is tydens die voorval beseer nie.
In Februarie vanjaar het Mitchell Stewart dié foto geneem tydens ’n vlug van Abu Dhabi na Parys. Die vlug het veilig in Parys geland.

Kyk wat gebeur as die vliegtuig deur weerlig getref word.

Bronne: dailymail.co.uk, physlink.com, telegraph.co.uk